Los blogueros asturianos van votar pol meyor blogue n'asturianu del añu

A la fin los blogueros asturianos, encabezaos pola páxina Trayasgaya, van votar pol meyor blogue n’asturianu del añu 2009. Alrodiu del ún de xineru esperen asoleyar la páxina onde va poder votase demientres tol mes, pa espublizar los resultaos nel mes de febreru.

Dende’l blogue Trayasgaya informen que va haber dellos cambeos como un sitiu onde votar, un corréu nuevu y una sistemática nueva, “amás de dalguna sorpresina más”, señalen. Del mesmu mou, agradecen la collaboración de Ricardo Candás, del blogue La Esfoyaza, y de González y González, ganadores de la votación del meyor blogue n’asturianu del 2008.
 
L'añu pasáu foi la primer vegada que se facía esta votación, na que votaron más de cuarenta blogues diferentes, teniendo un bon siguimientu y rempuesta por parte la comunidá bloguera.