La Dirección Xeneral de Trabayu ta acabante d'aprobar l'espediente de regulación d'empléu (ERE) temporal que la empresa siderúrxica ArcelorMittal presentó pa la totalidá de los sos trabayadores nel Estáu, más de 12.000 empleaos repartíos en 17 plantes. Esti ERE afita que los trabayadores regulaos cobren el 90 por cientu del so salariu brutu y va durar hasta'l 31 d'avientu d'esti añu, anque podría ampliase hasta'l 1 de xunu de 2010.

El Teatru Municipal de Samartín del Rei Aurelio en L'Entregu va acoyer esti próximu xueves 4 de xunu a partir de les 19:00 hores l'actu d'entrega de la Medalla d'Oru del conceyu a Chus Pedro y Manolo Peñayos, "Nuberu", que l'Ayuntamientu concedió en sesión plenaria de 25 de setiembre de 2008 pola so "trayectoria artística y musical y la so contribución a la cultura asturiana".

Carlos Suari (Avilés 1982) presenta esti miércoles a les 20:00 hores na Casa Posafuelles d'Uviéu (c/La Cuesta la Vega, 10) el so poemariu "Orbayu d'alfileres" (Suburbia). Nel actu va tar acompañáu pola editora Silvia Cosío. Con esti llibru "culmina y clausura’l ciclu poéticu" que l’autor entamó en "Treslallende", escritu xunto col tamién poeta Berto García.

Esti próximu xueves 4 de mayu tendrá llugar en Madrid la presentación de la segunda edición, iguada y ampliada, del llibru "La Guerra de Sucesión y Asturias", estudiu del historiador Evaristo C. Martínez-Radío. Asimesmo va presentar tamién la obra "La Alarma asturiana ante la ocupación francesa de 1810". L'historiador asturianu aborda nestes dos obres aspectos mui poco estudiaos na historia contemporánea del nuesu país. D'estes obres habrá otra presentación n'Asturies, nesti casu nel Club de Prensa Asturiana d'Uviéu'l 23 de xunu a les 20 hores.

El paru conseñáu nes oficines del Serviciu Públicu d'Empléu del nuesu país baxó en 951 persones nel pasáu mes de mayu, lo que representa un 1,29 por cientu. Esti datu dexa'l númberu de desempleaos n'Asturies nun total de 72.819 al finalizar el mes, según los datos asoleyaos pol Ministeriu de Trabayu. Sicasí, nel últimu añu'l desempléu aumentó en 22.041 persones, un 43,4 por cientu.

L'Aconceyamientu de Xuristes pol Asturianu califica de "vergoñosu" y "probetayu"'l proyeutu d’un “Reglamentu sobre presentación y receición d’escritos en bable/asturianu nel Rexistru de la Universidá d’Uviéu”, afitando amás que delles partes del mesmo son "nulos" por amenorgar derechos conseñaos na Llei del Asturianu de 1998.

La selmana pasada Unidá Nacionalista Asturiana presentó énte la Xunta Electoral Central un modelu de papeleta electoral d'esta formación billingüe, igual que'l que s'usa nel restu de las comunidaes con llingua propia, na que figuraba'l testu en castellanu y n'asturianu. Sicasí, la Xunta electoral refugó dar como válida la papeleta propuesta al incluyir testu n'asturianu y "nun ser ésta una llingua oficial".

La Coordinadora Ecoloxista ta acabante de solicitar al Gobiernu asturianu la paralización cautelar de los sondeos que se tan faciendo pa la mina d'acebache d'Oles (conceyu de Villaviciosa) por parte de la empresa Garaysam SL. La razón d'esta solicitú son "los incumplimientos constantes dende qu'entamaron de les condiciones ambientales impuestes pola Conseyería d'Industria y Empléu pal plan de llabores".

El Molinón vivió un resumen perfectu de lo que fue esta temporada. Nervios y sufrimientu a partes iguales, que xunto a la épica amestáronse nun partíu qu'había que ganar. Y como yá pasó los dos últimos años nos partíos claves, el Sporting ganó. Un añu más, el nuesu país va tener un representante na máxima categoría del fútbol.

Por fin el Real Uviéu logró un oxetivu que se-y escapara l'añu pasáu de forma dramática, pero esti añu si fue quién a algamalo. El Real Uviéu da un primer pasu p'averase poco a poco otra vez a la élite del fútbol. La eliminatoria pol ascensu a 2ªB tuvo que resolvese a la fin na tanda de pelnaltis, por cuenta que'l Mallorca B logró acabar los 90 minutos con un resultáu favorable de 1-0, lo qu'igualaba la eliminatoria. A la fin los asturianos fueron meyores dende'l puntu de penalti, consiguiendo asina'l tan deseau ascensu.