Once sindicatos movilícense pa esixir la celebración de meses sectoriales

Los sindicatos ANPE, CSIF, FE-CC.OO, SAE, Satse, Sicepa, Simpa, STAJ, Suatea, Usipa y CSI convocaron esti llunes 25 de mayu una movilización pa esixir al Gobiernu asturianu la convocatoria darréu de constitución de la mesa sectorial nos ámbitos de la so competencia como son la sanidá, la xusticia, l'alministración pública y educación.

Los sindicatos convocaron una manifestación baxo la conseña "Sanidá, xusticia, alministración pública y educación: pola mesa sectorial", y ta previsto que salga a les 18:00 hores de la Estación del Norte d'Uviéu. Pela so parte, los profesores asturianos acordaron en Plenu Estraordinariu de la Xunta Personal Docente enzarros rotativos en centros públicos d'Asturies que van entamar el xueves 28 de mayu en Xixón, en protesta pola falta de negociación y esixendo la convocatoria de la Mesa Sectorial d'Educación y la retirada del Plan d'Evaluación,

UNA sofita les movilizaciones

El candidatu d'Unidá Nacionalista Asturiana a les elecciones europees fai un llamáu a la participación na manifestación del llunes 25 de mayu en defensa de los servicios públicos. Daniel Fernández Blanco, afitó l'apoyu de la federación nacionalista a la manifestación convocada. Pal candidatu d'UNA, la negativa del gobiernu asturianu a convocar les meses sectoriales de negociación, como piden los sindicatos convocantes, ye una amuesa del talante antidemocráticu del gobiernu, que “namás quier negociar colos que yá tán previamente d'alcuerdu con él, por mui poco representativos que seyan”, n'alusión al sindicatu UGT, l'únicu que nun se sumó a la convocatoria. “Ye tamién una demostración”, conseñó Fernández Blanco, ”de la prepotencia d'esti gobiernu, reforciada dende l'ingresu n'él d'IU, que pretende imponer los sos criterios ensin el menor diálogu colos representantes de los trabayadores, causando con ello les recientes fuelgues na sanidá y l'enseñu públicos”.