El Sporting ta a un pasu de la permanencia

El Sporting algamó trés puntos en Valladolid que pueden suponer la permanencia en Primera. Un partíu nel que los asturianos, a falta de bon xuegu, echaron ganes conscientes de lo que se taben xugando. La eficacia, xunida a dalgo de suerte y a un arbitraxe que por una vez benefició al Sporting, y sobre too les intervenciones del porteru Cuéllar dieron el trunfu a los xixoneses.

Trés veces llegó con peligru'l Sporting a la portería castellana y metió dos goles. Máxima efectividá nun partíu con poco fútbol pero compensao polo dramatico por cuenta de lo que se xugaben dambos equipos, enforma'l visitante. Nel entamu los asturianos cedieron la posesión del balón a un Valladolid que nos primeros minutos avisó mui seriamente la portería de Cuéllar con dos disparos qu'acabaron en parada y nel llargueru. Durante la primer media hora los asturianos sólo llegaron una vez con claridá gracies a un cabezazu nel área de Barral. Sicasí, los castellanon, pasaos los primeros minutos, fueron apagándose hasta que finalmente llegó'l primer gol de los sportinguistes gracies a un trallazu imparable de Camacho dende fuera del área.

Na segunda parte los pucelanos volvieron a adelantar llinies y salieron en tromba pa contra l'área visitante énte un Sporting agazapáu qu'esperaba la so oportunidá nun contrataque o a balón paráu. Por embargu sería'l Valladolid el qu'algamaría'l gol gracies a un contrataque de llibru que le defensa sportinguista nun supo parar y qu'acabó rematando Sesma a la rede visitante. Nesi momentu l'empate ponía a los asturianos con pie y mediu en Segunda. Pero a falta de diez minutos pal final llegó la épica en forma d'un remate de cabeza de Bilic nel área pequeña que daba la victoria a los sporitnguistes. Un trunfu certificáu nel descuentu gracies a un paradón de Cuéllar nun remate a quemarropa de Canobbio.

Trés puntos qu'asitien al Sporting con 40 puntos, cuartos pela cola y que dexa nes sos manes la permanencia. L'últimu partíu ye nel Molinón contra un Recreativo yá descendíu. Da igual lo que faiga Osasuna, Betis, Valladolid y Getafe: si el Sporting gana ta salváu.

Ficha técnica

Valladolid 1-Sporting de Xixón 2

Real Valladolid: Asenjo; Marcos, Baraja, García Calvo (Ogbeche, min. 83), Oscar Sánchez, Rubio, Medunjanin (Canobbio, min. 61); Pedro León, Víctor, Sesma (Rueda, min. 75); y Goitón.

Sporting: Cuéllar, Sastre, Gerard (Jorge, min. 60), Iván Hernández, Cámara, Diego Camacho, Matabuena, Pedro (Bilic, min. 66), Kike Mateo (Maldonado, min. 75), Diego Castro y Barral.

Goles: 0-1: Min. 43, Diego Camacho. 1-1: Min 69, Sesma. 1-2: Min. 78, Bilic.

Árbitru: Fernández Borbalán (andaluz). Sacó tarxetes amarielles a Sastre, Pedro, Cuéllar, Marcos y Medunjanin.