UCE acusa a los concesionarios asturianos de subir precios na mesma cantidá de les ayudes del Gobiernu a comprar coches

|

El presidente de la Unión de Consumidores d'Asturies (UCE-Asturies), Dacio Alonso, acusó güei a los concesionarios asturianos d'aplicar a los sos coches en venta subíes de preciu nuna cuantía que coincide coles ayudes anunciaes pol Gobiernu estatal a la compra d'automóviles, ye dicir, ente 1.000 y 2.000 euros. La organización anunció tamién una "cruzada (llegal) contra los bancos", polos "abusos" qu'éstos cometen na aplicación d'intereses a hipoteques, demores y gastos con tarxeta de creitu.
 
Alonso ofreció una rueda prensa pa denunciar públicamente estos aspectos y facer un llamáu a los consumidores pa que vayan a la UCE cola documentación correspondientes y-yos faigan conocer les sos esperiencies nesti sen.
 
Asina, no referente a les ayudes a la compra d'automóviles, informó de que "munchos posibles compradores se punxeron en contautu cola Unión pa informar de que fai unes selmanes nel concesionariu-yos dieron un preciu, y agora, tres l'anunciu de les ayudes, dichu preciu s'incrementó na mesma cantidá que les ayudes, 1.000 o 2.000 euros".
 
P'Alonso, les marques de vehículos "tán especulando coles ayudes", y anunció qu'en próximes feches van ofrecer "nomes concretos de cases y coches". Por esti motivu, fizo un llamáu a los consumidores pa qu'acudan a la Comisión Nacional de la Competencia y presenten la correspondiente denuncia nesti sen. Tamién criticó al Gobiernu central porque "el plantegamientu nun se fizo correctamente y xeneró esta rocea".
 
"CRUZADA CONTRA LOS BANCOS"
 
Per otra parte, anunció una "cruzada contra los bancos", en forma de presentación de demandes, polos "abusos" qu'al so xuiciu tán cometiendo na aplicación d'intereses a hipoteques, demores y gastos con tarxeste de creitu, que dende'l so puntu de vista, son muestra de la "usura" d'estes entidaes.
 
En primer llugar, acusó a les firmes bancaries de "blindar el suelu de les hipoteques nun 3,5%", de manera que los intereses nunca puean baxar d'esti puntu. Sin embargu, Alonso recordó que l'Euríbor ta nesti momentu nel 1,65%. "Si sumamos a esti índiz el 1% diferencial, díbemos tener un interés del 2,65%, lo que pue suponer aforros d'hasta 250 euros al mes", señalo'l presidente de la UCE, pal qu'esta rebaxa "yera la espectativa a la qu'aspiraben les families". "Na mayoría d'hipoteques n'Asturies, en llugar de baxar el tiempu, s'incrementó", añadió, p'a continuación tachar de la cláusula de "abusiva".
  
Una crítica asemeyada realizó nel casu de les intereses de retrasu, dao que "nun s'alcuentra nenguna póliza perbaxo del 20%". Sin embargu, recordó qu'existe una sentencia de l'Audiencia Provincial que fixa que nun puen superar el 12%.
 
Sobre les tarxetes de creitu, aseguró que se tán aplicando tipos del 25%, cuando "muncha xente ta pagando con estes tarxetes la bolsa de la compra".
 
En toos estos casos, Alonso realizó un llamáu a los ciudadanos, pa qu'acudan a la UCE coles sos hipoteques, les sos pólices, y los sos contratos de tarxetes de creitu, con oxetu d'estudiar cada casu y entamar aiciones llegales. "Que seyan los tribunales los qu'acaben cola usura bancaria", sentenció.
 
Alonso señaló que les entidaes financieres "son les culpables de l'actual crisis", y agora "prentenden aprovechase de la situación na que tán los ciudadanos". Criticó tamién el fechu de que los bancos tean mercando dineru al 1% y lo tean vendiendo al 10%, lo cual supón "un incrementu de beneficios del 400% o'l 500%".
 
LLEI DE SOBREENDEUDAMIENTU
 
Sobre esta situación, anunciaron que tres les elecciones europees van presentar una propuesta a los grupos representaos na Xunta Xeneral del Principáu, pa que'l parlamentu asturianu afale al Gobiernu del Estáu a entamar una "llei de sobreendeudamientu", col oxetivu d'ayudar a "munches families que tán en situaciones realmente complicaes".
 
P'Alonso, esta midida ye "más necesaria que nunca", y recordó que munchos países de la Unión Europea cuenten con una norma asemeyada.
 
Per otra parte, señaló qu'UCE estudia la puesta en marcha d'una escuela pedagóxica de planificación económica pa "enseñar les families a facer presupuestu y cumplilu". Diba tratase d'un aula con xente especializao qu'impartía técniques d'alministración económica famliar pa "tol públicu en xeneral".

Comentarios

Dicía-y Xuan a Marica: "Arriba culu arriba zanques, que nesti mundu too son trampes"

Gabis

Contador Estadistiques