L'Aconceyamientu de Xuristes pol Asturianu (AXA) negó güei que'l Principáu creare un órganu de traducción de llingua asturiana, y aseguró que lo único que fizo foi poner en marcha un nuevu puestu "pal que nun se desixe más que tener la condición de funcionariu de grau mediu", y nun se requier nenguna titulación nin conocencia de llingua asturiana.

UNA-mocedá entama esti sábadu 30 de mayu la so "I Xornada Internacionalista" dientro los actos que se tán faciendo n’Asturies pa conmemorar la declaración de soberanía de la Xunta Xeneral en 1808. Asina, col enfotu en remembrar tala fecha, esta organización entama una serie de charres en Candás y Xixón baxo’l lema “El nacionalismu del sieglu XXI”. Asturies, Cataluña, Colombia o'l Sahara van ser los protagonistes.

El diputáu d'IU-BA-Verdes, Francisco Javier García Valledor, afirmó en Lluanco (Gozón) que colos 135 millones d'euros que se pidieron pa la "supuesta segunda fase d'ampliación d'El Musel" diben poder resolvese nel añu 2009 y el 2010 toles inversiones necesaries pal sanimiamientu de la comunidá, en rellación cola depuración de les agües y del abastecimientu.

La independencia de Kosovo dexa un vacíu efeutivu na proteición internacional pa les minoríes, un fechu qu'empeora la situación d'estos grupos y obliga a un númberu d'ellos a abandonar el país, según alerta del Grupu Internacional pa los Derechos de les Minoríes (MRG, poles sos igles n'inglés) nun informe publicáu güei.
 
Nel so informe, esta ONG señala que les minoríes como los 'ashkali', los bosniacos, croates, exipcios, xitanos, serbios y turcos, ente otres, entamen a abandonar Kosovo, porque s'enfrenten a la esclusión y en munchos casos a la discriminación nel país.

Zapatero aseguró nel Senáu que la "realidá" llingüística española ye un "puntu d'equilibriu, un puntu intermediu" ente los que piensen que'l castellán "ta prohibíu nuna parte del territoriu nacional" y los que ven "marxinaes" les llingües cooficiales, y añadió qu'esi términu mediu ye'l que persigue l'Executivu: "defensa de les llingües cooficiales, pero tamién lóxicamente defensa, apoyu y proteición del castellán".

La Conseyería de Cultura ta acabante d'incluyir nel Inventariu del Patrimoniu Cultural d'Asturies el conxuntu histórico de les mines de Llumeres, asitiaes nel conceyu de Gozón. La resolución, publicada nel Boletín Oficial del Principado de Asturias, da-y de un altu grau de protección a les antigües mines, allugaes na parroquia de San Nicolás de Bañugues, y qu'a lo llargo de los sieglos XIX y XX constituyeron la principal esplotación de mineral de fierro nel nuesu país.

La Conseyería de Cultura convocó la XXX edición del premiu del Premiu "Juan Uría Ríu" pa trabayos d'investigación de carácter históricu, etnográficu, filolóxicu, musical, etc. sobre cultura asturiana. Los trabayos pueden tar escritos n'asturianu o en castellanu y pueden entregase hasta'l próximu 30 de xunu. El premiu ta dotáu con seis mil euros.

Los prexubilaos de Naval Xixón acordaron güei n'asamblea abandonar l'enzarru tres permanecer 22 díes nel astilleru. La decisión s'adoptó esti mediudía dempués de que se confirmare l'ingresu per parte de la compañía de 21 millones d'euros de la póliza que va garantizar el cobru de les sos prexubilaciones, según confirmaron fontes sindicales.

El Ministeriu d'Economía y Facienda garantizó la financiación de les obres restantes p'acabar l'ampliación del puertu. El procedimientu va acordase nuna próxima xunta ente'l Principáu d'Asturies y el Ministeriu de Fomentu, según informó'l Gobiernu asturianu tres caltener el presidente del Principáu, Vicente Álvarez Areces, un conceyu cola vicepresidenta segunda del Gobiernu y ministra d'Economía y Facienda, Elena Salgado.

L’Asociación Cultural l’Arribada ta acabante de dar anuncia de la convocatoria del "III Premiu Timón", col que se quier facer reconocencia d’una trayectoria lliteraria d’especial valir construyida "n’asturianu o en cualesquiera de les variantes propies del dominiu asturllionés". El plazu pa la presentación de candidatures ta abiertu dende'l 24 de mayu y fina’l 30 d’agostu viniente. Los ganadores anteriores fueron, en 2007, la poetisa va poco fallecida Nené Losada Rico, y en 2008 Xuan Xosé Sánchez Vicente.