El PP aceptó güei les enmiendes pa la so proposición non de llei referente al asturianu na que pidía al Gobiernu del Estáu que reconoza xurídicamente la especialidá pal profesoráu qu'imparte la enseñanza. La iniciativa aprobóse por unanimidá, pero pasando de ser una exixencia a una solicitú d'estudiu de la posibilidá.
 

Los trés grupos parlamentarios PSOE, PP y IU-BA-Verdes ofrecieron tol so apoyu al conseyeru d'Industria y Emplegu del Principáu, Graciano Torre, pa evitar el zarru de la planta de la empresa de refractorios Vesuvius Ibérica, asitiada en Riañu (Llangréu).
 

El colectivu Ecoloxista d'Avilés solicitó a la Demarcación de Carreteres y a la Direición Xeneral de Biodiversidá del Principáu que modifique la resolución, onde s'anuncia'l futuru trazáu de la nueva carretera AS-17, Avilés-Puertu Tarna, pa la conexón per autovía ente Avilés y Llanera.

L'Institut d'Estudis Catalans (IEC) acaba publicar un informe ellaboráu por Eva Pons y Natxo Sorolla sobre la situación de la llingua catalana ente los años 2005 y 2007, que recueye, sobre too, la influencia que les reformes de los estatutos tuvieron en materia llingüística, y critica duramente la "política secesionista" de la Comunidá Valenciana al considerar el valencianu como llingua propia.

El PSOE ye'l ganador claru ente los residentes ausentes, siguíu a abonda distancia por PP, IU-BA y UNA. UPyD queda con 71 votos, per detrás de Los Verdes (114) y el PACMA (200).  El restu del votu tuvo espardíu ente formaciones como Andecha Astur (40), IZAN (18), I.I. (17) o'l PCPE (37).
 

El xerente de la Sociedá Mista de Xestión y Promoción del Suelu d'Asturies (Soxepsa), José María Quirós, evitó esclarar quién tomó la decision y en qué términos de nun remtir a la Sindicatura de Cuentes la documentación solicitada pa la ellaboración del so informe definitivu sobre los contratos d'alta direición del "sector públicu rexonal del Principáu d'Asturies". El PP entrugó pol asuntu, igual que, dempués el PSOE, qu'insistió.

La controvertida llei "Internet y creación", conocida tamién como "Llei antipiratería", que tenía como oxetivu "lluchar contra les descargues illegales" y afitaba la posibilidá de desconexón a la rede a los usuarios que descargasen illegalmente conteníos con copyright, fue valtada en bona parte del so conteníu pol Conseyu Constitucional francés, qu'afita nel so dictame qu'esta llei "vulnera la presunción d'inocencia y cuestiona'l derechu a la información".

La editorial La Cruz de Grau y Xareos! Xestión Cultural tán acabante d'asoleyar el númberu 5 de la revista de lliteratura FORMIENTU, una publicación que busca esparder "la obra de los autores más mozos de la lliteratura asturiana, dando a conocer a les nueves promeses de les nueses lletres".Esti númberu ta dedicáu a la escritora Nené Losada Rico, finada apocayá.

El Colectivu Sociocultural Muyeres “Les Filanderes” de Llangréu convoca'l VIII Certame Internacional de Relatos Cortos “Filando cuentos de Muyer”. La participación será con obres escrites en castellanu o asturianu y versará sobre cualesquier aspectu venceyáu cola realidá de les muyeres, les sos aportaciones no social, cultural, familiar, deportivu, económicu, etc. Afítase un primer premiu de 1500 euros, un segundu de 500 euros, un terceru de 300 euros y dos accésit (publicación y diploma).