El voceru del Bloque por Asturies, Pablo Fernández, pidió al Partíu Popular que seya "coherente colo que diz" porque piden la creación d'especialidá del asturianu, cuando "son los primeros que criminalicen a los que defenden la llingua".

Según informó al traviés d'un comunicáu, el colectivu pudo comprobar que l'Autoridá Portuaria de Xixón ta conectando a les dragues a una tubería flotante, pa efectuar el vertíu de los materiales con destín a l'ampliación del puertu, lo qu'al so xuiciu ye una "clara evidencia de que la so denuncia yera rigurosa y bien fundamentada".

Un colectivu de trabayadores de la comarca del Caudal convocó una manifestación pal próximu vienres 12 de xunu col oxetivu de lluchar contra la "indefensión de la población en xeneral ante l'avalancha de despidos y regulaciones d'emplegu", que recordaron, qu'afeuten a toa Asturies, y más concretamente, a les cuenques mineres. Los miembros d'esta formación decidieron crear esti colectivu, dende'l que güei se criticó a los partíos políticos porque, na so opinión, "nun se supo dar respuesta a les necesidaes de los ciudadanos".

El plenu ordiarniu de la Xunta Xeneral va aldericar el vienres una propuesta non de Llei del Grupu Parlamentariu Popular sobre la creación de la especialidá d'asturianu pal profesoráu qu'imparte esta enseñanza n'educación infantil, primaria y secundaria.Trátase d'una proposición non de llei que presentaron el pasáu 19 de mayu los diputaos populares Joaquín Aréstegui y Emilio Pérez Cueva pa esixir la execución d'una midida plantegada pola Plataforma de Profesores de Llingua Asturiana y polos sindicatos.

La Fiscalía del Tribunal Superior de Xusticia d'Asturies (TSXA) apreció irregularidaes na actuación del ex arquitectu municipal de Xixón Ovidio Blanco, qu'algamó una plusvalía de 600.000 euros cola compraventa d'una parcela afeutada pol Plan de Cabueñes. El fiscal, Joaquín de la Riva, tien previsto unviar decretu de denuncia pola "supuesta comisión de delitos contra l'Alministración Pública", al xulgáu d'instrucción correspondiente de Xixón, pa qu'instruya'l casu. De la mesma manera, va pidir la declaración énte'l xulgáu del ex arquitectu municipal.

El xueves 18 de xunu a les 19:30 los poetes Pablo X. Suárez, Sofía Castañón y Carlos Suari lleerán parte de les sos obres ente'l públicu del Atenéu de Turón. Trátase d'un recital qu'axunta a autores mozos (menores de 30 años) pero que yá cuenten con dellos años de trayectoria poética. Esti actu va pesllar el ciclu d'Alcuentros con Autores d'esta temporada entamaos pol Serviciu de Normalización Llingüística del Conceyu de Mieres.

El Partido Popular ye'l trunfador nestes elecciones europees al algamar 6.610.702 votos (42,23%) y 23 escaños. Detrás situase'l PSOE con 6.027.999 votos (38,51%) y 21 escaños. Tamién van tener representación Coalición por Europa (CiU-PNV-CC) con 2 escaños, Izquierda Unida con 2, UPyD con 1 y Europa de los Pueblos (ERC-BNG-Aralar-CHA-EA) con 1. N'Asturies ye'l PSOE'l ganador. Detrás situase'l PP, IU-BA y UPyD. 

Unidá Nacionalista Asturiana ye la fuerza nacionalista mas votada nestes elecciones con 3.296 votos nel conxuntu del Estáu. Andecha Astur situase con 2.199 votos. No que cinca a Asturies, UNA algamó 846 votos (0,20%) siendo'l sétimu partíu mas votáu, mientres qu'Andecha Astur tuvo 766 (0,18%) siendo la décima fuerza.
 
Otres opciones como Iniciactiva Internacionalista algamaron 826 votos (0,20%), el PCPE 779 (0,19%) y Izquierda Anticapitalista 657 (0,16%).

Los resultaos de participación, asoleyaos pol Ministeriu del Interior al cierre de les urnes, asitien el porcentaxe de votantes nun 46,02% nel nuesu país. Nes pasaes elecciones fue del 46,33%, polo tanto llixeramente mas baxa qu'hai cinco años. Nel total del Estáu la cifra de participación fue del 45,81%, mientres qu'en 2004 foi del 45,94%.

El Conseyeru d'Educación y Ciencia, José Luis Iglesias Riopedre, inauguró ayeri la I Sestaferia del Profesoráu de Llingua Asturiana: 'Xornaes de desarrollu curricular y didáctitu', y destacó la "importante presencia" del asturianu y nes aules del Principáu, onde estudien la materia 17.000 alumnos de Primaria y 4.450 de Secundaria.