El PP y la especialidá docente d'asturianu: de llevala nel so programa eleutoral a votar en contra

El programa eleutoral del PP pa les eleiciones del 2012 incluyía dos puntos al respeuto de la Educación n’asturianu: la garantía de la ufierta de la materia nos centros y la creación de la especialidá docente. Nesa mesma llexislatura votaba en contra d’esta midida última na Xunta Xeneral y esti miércoles facíalo nel Congresu, pero nel 2009 presentara nel nuesu Parllamentu una PNL na que pidía la so reconocencia.

“El PP aceptó güei les enmiendes pa la so proposición non de llei referente al asturianu na que pidía al Gobiernu del Estáu que reconoza xurídicamente la especialidá pal profesoráu qu'imparte la enseñanza. La iniciativa aprobóse por unanimidá, pero pasando de ser una exixencia a una solicitú d'estudiu de la posibilidá”, espresaba Asturies.com na entradina de la noticia ‘El PP acepta la enmienda del PSOE a la moción sobre la especialidá del asturianu, que la torna nuna solicitú d'estudiu’ espublizada’l 12 de xunu del 2009. Naquel añu la formación popular tenía esta vieya demanda del sector educativu y del profesoráu ente los sos oxetivos políticos, hasta’l puntu d’incorporala al so programa eleutoral.

El cambiu, sicasí, vieno na llexislatura partida pola convocatoria adelantada d’eleiciones fecha por Francisco Álvarez-Cascos, garrando la presidencia’l socialista Javier Fernández. Izquierda Xunida presentaba otra PNL na Xunta Xeneral nel mesmu sentíu en payares del 2014, que salió alantre nesta ocasión col sofitu del PSOE, Foro y d’UPyD, pero cola oposición única del PP.

D’esta forma incumplía’l so programa eleutoral, que na estaya d’Educación con respeuto al asturianu incluyía la garantía de la ufierta de la materia nos centros y la creación de la especialidá docente. Naquel momentu’l PP gobernaba a nivel estatal.

De la oposición al ataque

Ayeri vivióse nel Congresu, na Comisión d’Educación y Formación Profesional, un episodiu nuevu del xiru dau pol PP con otra PNL presentada pa la so creación, nesta ocasión por Xuníes Podemos. Paloma Gázquez, diputada del PP por Asturies, dedicó gran parte de la so intervención n’atacar al asturianu y, sobre la especialidá, al final del so discursu, llegó a dicir que “tendría sentíu si hubiera demanda nos centros educativos pa estudiar la llingua asturiana, pero nun la hai”.

Siguió darréu cola afirmación de que “pretenden dir contracorriente; imponer una especialidá que los alumnos nun opten por ella. Nun ye una demanda social, la tendencia ye a la baxa, y fíxese, por muncho que-yos duela, que’l porcentaxe de matriculación onde realmente medra ye en Relixón”.

Na semeya, Gázquez ayeri nel Congresu.