La revista Formientu asoleya’l so númberu 5

La editorial La Cruz de Grau y Xareos! Xestión Cultural tán acabante d'asoleyar el númberu 5 de la revista de lliteratura FORMIENTU, una publicación que busca esparder "la obra de los autores más mozos de la lliteratura asturiana, dando a conocer a les nueves promeses de les nueses lletres".Esti númberu ta dedicáu a la escritora Nené Losada Rico, finada apocayá.

Dende Formientu afiten amás que "col oxetivu de siguir meyorando na calidá lliteraria de la revista, estrenamos Conseyu de Redaición, que pasa a ser fixu, de la mano de la filóloga y escritora Laura Marcos, como coordinadora, l’editor César García Santiago y l’escritor Bénxa Pérez. Un equipu que vien a da-y a la revista un trabayu d’analís y esbilla más fondu".

Asimesmo señalen que "como en cada númberu apaecen dellos nomes nuevos na revista, ye’l casu de Rubén Rey Menéndez, que vien col aval de dellos premios algamos y de Javier Cubero de Vicente, conocíu pol so trabayu como hestoriador n’otres publicaciones. Amás cuntamos con otra llarga riestra d’autores, espuesta más alantre, que vienen collaborando nel pasáu con Formientu y qu’amuesen novedaes, como les traducciones del catalán d’Iván Cuevas, feches con tol procuru y coles qu’abrimos una estaya inesplorada en Formientu, la de les tornes".

Nesti númberu 5 apaecen Rubén Rey Menéndez, Javier Cubero de Vicente, Benxa Pérez, Héctor Pérez Iglesias, Inacio Rodríguez-Solar, Jorge Fernández García, Berto García, Laura Marcos Domínguez, Fran Melero «Frantxu», Verónica Canel, Javier Cayado Valdés y Miquel Martí i Pol tornáu por Iván Cuevas.

Formientu ñació nel añu 2006 dirixida por Inaciu Galán y baxo la edición de Xareos!.