El Conseyu Constitucional de Francia acaba con bona parte de la "Llei Antipiratería"

La controvertida llei "Internet y creación", conocida tamién como "Llei antipiratería", que tenía como oxetivu "lluchar contra les descargues illegales" y afitaba la posibilidá de desconexón a la rede a los usuarios que descargasen illegalmente conteníos con copyright, fue valtada en bona parte del so conteníu pol Conseyu Constitucional francés, qu'afita nel so dictame qu'esta llei "vulnera la presunción d'inocencia y cuestiona'l derechu a la información".

Un mes depués de que l'Asamblea francesa diera'l preste a la controvertida llei, los nueve miembros del Conseyu COnsitucional de Francia recorten bona parte del so conteníu por mor que tien que ser la xusticia y non una autoridá del gobiernu la que xulgue los casos de vulneración de los derechos d'autor n'internet, y nel so casu'l qu'afite les sancioens correspondientes al usuariu.

La "Declaración de Derechos del Home" de 1789 y l'accesu a Internet como derechu fundamental

Según el Conseyu Constitucional, "la llibertá de comunicación y d'espresión, afitada nel Artículu 11 de la Declaración de los derechos del Home y del ciudadanu de 1789, ye un referente na xurisprudencia pal Conseyu Constitucional" y añade que "esta llibertá implica anguaño que debe considerase'l desarrollu xeneralizáu d'internet y la so importancia pa la participación na vida democrática y na espresión d'idees y d'opiniones, asi como la llibertá pa les persones d'acceder a estos servicios de comunicación online".

Lo que dicía la Llei

Esta llei afitaba la desconexón de la rede durante un periodu que puede dir de los trés meses a un añu. Sicasí, l'encargáu de sancionar a los infractores nun diben ser los tribunales ordinarios, sinón una "Haute autorité pour la diffusion des œuvres et la protection des droits sur Internet" ("HADOPI" o "Alta Autoridá pa la Difusión d'Obres y la Protección de Derechos sobre Internet"), que tendría como oxetivu adoptar una respuesta "gradual" a los internautes que fixeren descargues "illegales".

El procesu sancionar yera'l que vien darréu: detectada una infracción y localizáu l'usuariu al traviés de la so IP, en primer llugar diba unvíase-y un corréu electrónicu d'alvertencia; si reincidía habría un segundu corréu acompañáu d'una carta certificada y, nel casu d'una tercer reincidencia, una comisión podría ordenar que se-y cortare l'accesu a internet durante un periodu d'ente trés y doce meses ensin que por ello l'usuariu dexare de pagar el serviciu.