Cangas entama la campaña "Nós respetamos el mediu ambiente n’asturianu"

El Conceyu de Cangas informa qu'entama la campaña "Nós respetamos el mediu ambiente n’asturianu", midida cola que quier concienciar a la sociedá "en materia de sostenibilidá medioambiental mediante’l repartu pelos comercios de Cangas de bolses de papel recicláu" col logu «¿Tu qué faes pa cuidar el mundu? Reduz, recicla, reutiliza». Esta actividá va desendolcase dende’l 24 de xunu hasta acabar coles existencies

Según informa Mónica Rodríguez Riesgo, responsable del Serviciu de Normalización L.lingüística de Cangas del Narcea, esta campaña "ye común al nuesu conceyu y a los de Mieres, Avilés, y L.lena, toos dientro de la Rede de Normalización Llingüística nos Conceyos". Anque’l conceyu va encargase de repartir y promocionar la campaña ente los sos establecimientos, cualquier comerciu de la zona puede pasar a recoyer les bolses correspondientes nel Serviciu de Normalización L.lingüística, asitiáu na Axencia de Desarrollu del Conceyu, C/ Uría, 18, baxu, o solicitales llamando al 985 81 05 60.