Groenlandia va camín de l'autodeterminación

Esti domingu entró en vigor el nuevu estatutu d'autonomía de Groenlandia, islla baxo soberanía danesa dende entamos del sieglu XIX. El nuevu estatutu conseña la posibilidá d'entamar un referéndum d'autodeterminación y afita al groenlandés como única llingua oficial del territoriu. Esti fechu coincide cola llegada al poder de los independentistes del "Inuit Ataqatigiit", tres trunfar nes elecciones celebraes el 2 de xunu pasáu nes qu'algamaron 14 de los 31 escaños del parlamentu.

El nuevu estatutu d'autonomía, aprobáu en referéndum el pasáu 25 de payares de 2008 por 21.355 votos favorables (75,54%) frente a 6.663 (23,57%) negativos, entró en vigor esti 21 de xunu, Dia Nacional de Groenlandia. Ente otres disposiciones esti testu afita al groenlandés, variante llingüística inuit, como única llingua oficial. Asimesmo'l Gobiernu autonómicu asume'l poder no que cinca a la esplotación de los recursos naturales (gas y petróleu), lo que podría da-y viabilidá económica a una futura independencia.