Asturies incorpórase al Plan Moto-E, al que destina 200.000 euros pa incrementar les ayudes del Gobiernu central

El conseyeru d'Industria y Emplegu del Principáu, Graciano Torre, informó a l'Asociación Nacional d'Empreses del Sector de Dos Ruedes (Anesdor) de la intención del Gobiernu del Principáu de sumase al pidimientu realizáu pol Ministeriu d'Industria d'incrementar coles cantidaes correspondientes a cada casu la compra, nos concesionarios asitiaos na nuesa comunidá, de los ciclomotores y motocicletes que cumplan les disposiciones y suxerencies del Plan Moto-E, igual que se sumó al Plan 2000-E pa vehículos de cuatro ruedes.

   Según la información remitida por Torre a los profesionales del sector, a la que tuvo accesu Europa Press, la cuantía global que'l Gobiernu autonómicu va destinar a esti plan va ser de 200.000 euros, polo que la vixencia del mesmu va estendese mientres nun s'agote esta cifra.

   El Principáu va bonificar coles mesmes cantidaes que'l Gobiernu d'España, ye dicir 75, 175 o 250 euros, según el tipu de vehículu, a los ciclomotores o motocicletes que reciban l'ayuda del Ministeriu y del sector de fabricantes o importaciones.

   Amás, l'ayuda va estendese a tolos vehículos mercaos nes anteriores condiciones, a partir del día 9 de xunetu del 2009.

   En cuanto a les condiciones establecíes pol Ministeriu d'Industria pa ser beneficiaru de la parte incrementada pol Gobiernu del Principáu d'Asturies, los compradores deben acreditar l'empadronamientu nesta Comunidá Autónoma enantes del 1 de xineru del 2009.

   Ta previsto que'l pagu a los concesionarios s'efeutúe al traviés d'una entidá collaboradora, mediante conveniu firmáu conxuntamente  cola mesma y col Ministeriu d'Industria, tando acordao que los concesionaros que deseen beneficiase d'esta iniciativa s'inscriban nuna base de datos informática que se-yos comunicará nel so momentu.

   Sicasí, el conseyeru indicó qu'al tar tramitándose tou esti procesu alministrativu, nun va poder facese efeutivu'l pagu a nengún concesionariu, hasta que'l mesmu nun tea completu, polo que son estos últimos los que nel so casu deben facer frente a los descuentos, como pasa colos correspondientes al Ministeriu d'Industria.