El Serviciu de Normalización Llingüística de la Mancomunidá de la Comarca de la Sidra ta acabante de dar anuncia del VII Concursu de Cómic n'Asturianu "Comarca de la Sidra". Nelli van poder participar persones de cualquier nacionalidá, de forma individual o colectiva, qu’a la fecha d’entrega de los trabayos tengan fechos los 14 años. El plazu de presentación acaba’l 13 de Payares de 2009 y tien un primer premiu de 500 € y dos accésit de 200 € caún pa los dos trabayos finalistes.

El piragüista maliayés Manuel Busto algamó'l por quinta vez el Campeonatu d'Europa de K-1, celebráu esti fin de selmana pasáu n'Ostrada (Polonia). Con esti nuevu trunfu el palista asturianu yá suma cinco campeonatos d'Europa y nueve del mundu, nes modalidaes de K-1 y K-2, siendo ún de los deportistes asturianos más galardonaos na historia del deporte d'esti país.

Non sólo con güelgues y bloqueos se protesta en Bolivia. A 4.100 metros sobre'l nivel de la mar, na ciudá d'El Alto, cientos de mozos escupen el so descontentu social per mediu d'ácides rimes que lleven un sellu mui particular: la llingua aymara, de los sos pas y güelos.

Tres una reunión acabante de celebrar en Madrid ente'l presidente asturianu Álvarez Areces y el ministru de Fomentu, José Blanco, esti últimu dio anuncia que'l Ministeriu va garantizar la finalización de les obres d'ampliación del puertu d'El Musel (conceyu de Xixón) con un préstamu de 215 millones d'euros, un dineru que va ser incluyíu nos Presupuestos Xenerales del Estáu pal añu que vien.

La Conseyería de Mediu Rural del Gobiernu asturianu nun tien previstu entamar nenguna midida pa llendar la espansión de les plantaciones d'ocalitu, asemeyada a l'aprobada pol Ayuntamientu d'Illas, xestionáu igual que la cartera autonómica por IU-BA-Verdes. La Coordinadora Ecoloxista pela so parte exixe que se reduza l'actual superficie ocupada por esta especie, mientres que los madereros piden que se consulte colos propietarios de finques la posibilidá de permitir nueves plantaciones.

La Encuesta de Población Activa (EPA) fecha pública pol Instituto Nacional de Estadística (INE) conseña que'l desempléu aumentó nel nuesu país en 9.900 persones durante'l segundu trimestre del añu, lo que supón un incrementu del 16,91%. El total de paraos n'Asturies ye de 68.400, un 14,04%.

Per otru llau, el ministru de Fomentu, José Blanco, anunció que'l próximu llunes va aconceyase col presidente del Principáu d'Asturies, Vicente Álvarez Areces y van buscar una solución conxunta a los aumentos de coste nes obres de meyora del Puertu d'El Musel, en Xixón. El ministru nun quiso entrar en detalles porque aseguró que "vio yá demasiaes especulaciones" y nun quier "alimentar más".

La Comisión de Siguimientu del Pactu Antitransfuguismu, presidíu pol ministru de Política Territorial, Manuel Cháves, declaró seis nuevos casos de transfuguismu, ente los que ta'l del ex-conceyal d'Izquierda Asturiana nel Conceyu de Piloña, José Ángel García, 'Allende'.

Más de 150 bateadores d'oru de casi toles comunidaes autónomes, y dalgunos países estranxeros, van tomar parte esti fin de selmana nel novenu Campeonatu Nacional d'esta modalidá, que va acoyer la villa tineana. L'eventu deportivu inclúi na so programación el décimu 'Concursu Folk Cuartu de los Valles', cola actuación de grupos de diferentes zones del Estáu, amás de la celebración, el domingu, del Festival Vaqueiru.

Esti próximu domingu 26 de xunetu va celebrase'l XI Mercáu Tradicional Allerán en Murias (conceyu d'Ayer), entamáu pola Asociación Cultural La Colegiata. El mercáu va emprincipiar a les 11:00 hores con más de cuarenta puestos d'artesanos y talleres en vivu. A les 13:00 hores va entamase una misa na capiya de la Virxe de las Nieves y darréu la tradicional Puya'l Ramu. Depués va actuar Milio del Nido a les 14:00 hores.