Los conseyeros de Mediu Rural y d'Emplegu van ofrecer a Albo ayudes económiques qu'eviten el so zarru en Candás

Los conseyeros de Mediu Rural, Aurelio Martín, y Industria y Emplegu, Graciano Torre, van caltener un conceyu colos representantes d'Albo, nel que van ofrecer llinies d'ayuda económica pa evitar el so anunciáu zarru na factoría de Candás, previstu pal 31 de xunetu, y el treslláu d'esta actividá a Vigo.

   Asina lo anunció Aurelio Martín en rueda prensa, tres caltener un conceyu colos representantes sindicales de los trabayadores de la planta candasina, asina como los responsables de les Federaciones d'Agroalimentación d'UXT, Marisa Gómez, y Comisiones Obreres, José Antonio Iglesias.

   Tovía nun hai fecha pal mencionáu alcuentru, que'l Gobiernu yá solicitó formalmente, y que va llevase "cola discreción necesaria nestos casos", matizó'l conseyeru. Martín esplicó que l'Executivu autonómicu "va facer tolos esfuerzos necesarios y razonables pa que la empresa Albo caltenga la so actividá n'Asturies. Ye interés del Principáu contribuyir a la so modernización y competitividá. Mediu Rural y Pesca tien llinies d'ayuda y sovención pa modernización y compra de material, y d'equipos y teunoloxía que favorezan la modernización y competitividá de les empreses asitisaes nesta comunidá".

   De magar esta ufierta, el conseyeru matizó que "ta dispuestu a tener una conversación como con cualquier otra empresa pa contribuyir a la so actividá, y entamar el so funcionamientu. Nun vamos con un plantegamientu peslláu". "Queremos ver el problema y baraxar alternatives, y tou tipu de posibilidaes pa que la empresa puea reconsiderar la so decisión d'abandonar esta comunidá", acabó.