Rabanal diz que "Asturies meyora en términos absolutos y relativos, y caltiénse penriba de la media"

|

El conseyeru d'Economía y Facienda del Principáu d'Asturies, Jaime Rabanal, afirmó que cola propuesta presentada pol Gobiernu central respeuto al nuevu modelu de financiación autonómica, Asturies "diba meyorar el términos absolutos y relativos y va siguir asitiada penriba de la media". "La nuesa respuesta al nuevu modelu ye favorable, anque con reserves", dixo'l conseyeru.

   Rabanal, qu'aseguró que'l Ministeriu tovía nun-yos treslladó una cifra concreta, insistió en destacar que "el procesu de negociaciones caltiénse abiertu hasta'l próximu miércoles", polo que'l Gobiernu del Principáu va tratar de reforzar dalgunos aspeutos que consideren importantes y que nun tán lo bastantes definíos y van lluchar por "hasta l'últimu euru".

   Nuna rueda de prensa, celebrada na sede de Presidencia, Jaime Rabanal indicó que'l modelu "cumple gran parte de los oxetivos plantegaos pol Principáu" y da respuesta a cuestiones que dende Asturies considérense fundamentales.

   Nesti sen, destacó que, en rellación col avieyamientu, el nuevu modelu almite y reconoz l'equivalente del grupu de trabayu del gastu sanitariu. En cuanto al espardimientu pasa de pesar un 0,46 a un 0,60. Sobre esti aspeutu Rabanal indicó que se trata de "un avance importante", anque al Principáu diba presta-y que'l pesu fuere mayor, polo que siguen nel procesu de tratar de que seya así.

   Esplicó amás que se crea un nuevu fondu de 1.200 millones pa l'atención a la dependencia, una cuestión tamién plantegada por Asturies, igual que'l que se tengan en cuenta los ingresos reales. Amás, el modelu de "dalguna manera" establez llendes a la competencia fiscal de les comunidaes.

   "En definitiva, dase respuesta a la mayoría de les cuestiones fundamentales que plantegamos", dixo Rabanal, qu'indicó que falar de cifres estimaes "sólo contribúi a la guerra de cifres, y a la confusión, porque si ún fai cuentes les cifres aportaes poles diferentes comunidaes yá sumen más de 11.000 millones".

Comentarios

Como diz mio madre:
"Tamién pasa un pirru con un tranquezu"
Vaya porquería de gobernantes, y tovía saquen mayoríes.

Lo que nun cuenta ye lo que se dexa d'ingresar por nun declarar l'asturianu llingua oficial.
Pero bueno, pa da-y respuesta a eso yá tenemos a Javier Fernández: "por favoooooor..."

Contador Estadistiques