El gobiernu asturianu destina 696.000 euros pa traducir la so web al asturianu y al inglés

El gobiernu asturianu ta acabante d'aprobar na so reunión selmanal del Conseyu de Gobiernu una partida de 696.000 euros pa "la contratación del servicio de traducción de contenidos del portal corporativo del Principado de Asturias" al asturianu y al inglés.

Según afita la resolución "l'oxetu del contratu ye la realización de trabayos de traducción, al inglés y al asturianu, de conteníos del portal corporativu del Principáu de Asturies, www.asturias.es, durante los años 2009 a 2012".

Esta medida "enmárcase nel artículo 4 de la Llei 1/1998, de 23 de marzu, d'Usu y Promoción del Bable/Asturiano, nel que ta fitao l'Alministración autonómica velará por una presencia adecuada del bable/asturianu nos medios de comunicación".

Y nel casu de la traducción del portal corporativu al inglés, "insértase nel marcu de desarrollu de la Llei 11/2007, de 22 de xunu, d'Accesu Electrónicu de los Ciudadanos a los Servicios Públicos, facilitando la interoperabilidá de los servicios paneuropeos d'alministración ellectrónica y cumpliendo la Directiva 2006/123/CE del Parlamentu Européu y del Conseyu sobre los servicios nel mercáu interior".