Los ayuntamientos de Xixón, Avilés y Uviéu tán ente los once más tresparentes del Estáu, según l'informe ellaboráu pola ONG Transparencia Internacional España. Avilés y Xixón algamen una puntuación de 97,5 sobre cien y asítiense en segundu llugar, xunto con Bilbao, Mataró y Alcobendas.

El Gobiernu asturianu aprobó, dientro de los alcuerdos del Conseyu de Gobiernu, un gastu de 33.000 euros destinaos a subvenciones d'actividaes rellacionaes col fomentu llingüísticu pa los conceyos de Llangréu y Piloña, y pa la Mancomunidá Ozcos-Eo. L'Ayuntamientu de Piloña recibirá 12.000 euros pa la so oficina de normalización, mientres qu'al de Llangréu destinaránse otros 9.000 pal Centru de Cultura y Llingua Asturiana de la Casa de los Alberti.

El parlamentu de Córcega ta acabante de refugar una moción presentada pol diputáu independentista Jean-Guy Talamoni, cabezaleru de la formación Corsica Nazione Indipendente, na que se pidía "dar un estatutu d'oficialidá" a la llingua corsa, polo que'l francés va siguir siendo la única llingua oficial na islla mediterranea. La moción foi refugada por 28 diputaos, mientres que 19 sofitáronla sobre un total de 47 diputaos presentes nun parlamentu autómomu de 51 escaños.

Esti sábadu va celebrase en Sama (conceyu de Llangréu) el IX Alcuentru de Bandes de Gaites Santiago 2009, entamáu pola Banda Gaites Conceyu de Llangréu y que va contar cola participación de les bandes de gaites Charamuscas (Galicia), Saint-Nazaire (Bretaña) y les asturianes Noega, La Laguna del Torollu y l'anfitriona Llangréu, amás del grupu folk Duerna y de los hermanos Valle Roso.

El Xixón Baloncestu desapaez depués de 27 años d'historia y dos etapes na máxima categoría del baloncestu estatal. El club asturianu nun va inscribise en nenguna competición la próxima temporada al nun ser quién a algamar l'aval necesariu pa competir na LEB plata, polo qu'entama la so desaparición. Dende'l club culpen de la situación al Gobiernu asturianu por camudar "unilateralmente los términos del alcuerdu suscritu y retrasar el pagu de la subvención que n'anteriores temporaes abonaba en dos plazos".

La Tertulia Pachín de Melás, que dende hai unos meses vien desarrollando en Xixón alderiques abiertos sobre bayura de temes sociales y culturales, anuncia pa esti xueves 23 de xunetu un nuevu alderique col títulu de "Regasificadora en Xixón. Necesidá y peligros". Nelli van participar Leopoldo García, portavoz de la Plataforma Regasificadora NON, Paco Ramos d'Ecoloxistes n´Acción y Ramón González "Turón", vecín afectáu. L'actu va tar moderáu por Tino Fernández, portavoz de mediuambiente d´UNA.

El conceyu de Cuideiru va acoyer los actos gubernamentales del Día d'Asturies 2009, que van celebrase durante cuatro díes consecutivos, del 5 al 8 de setiembre. Asina anunciólo'l Presidente del Gobiernu asturianu, Vicente Álvarez Areces, qu'anticipó'l cartel musical del eventu nel que figuren les actuaciones de "Tejedor", "El Sueño de Morfeo", Luz Casal y Miguel Ríos.

n total de 19 oses pardes identificaes llogró sacar alantre a 37 críes nel Cordal Cantábricu demientres 2008, d'acordies colos datos del censu d'oses con cría que realicen los gobiernos autonómicos d'Asturies, Cantabria y Castiella y Lleón, conxuntamente cola Fundación Osu Pardu. Per zones, les poblaciones occidentales tán nuna situación de reproducción más favorable que les orientales.

El Llaboratoriu de Viroloxía del Hospital Central d'Asturies acaba conseñar seis casos nuevos d'infección pol virus de la gripe A/H1N1 nel nuesu país. Con estos, númberu d'infecciones detectaes na Asturies eleváse a 18. Sicasí, tolos pacientes, sacante estos casos nuevos, tienen yá l'alta médica.
 

El conceyal d'Urbanismu, Pedro Sanjurjo, aseguró que l'Ayuntamientu de Xixón va proceder a la contestación de les alegaciones a les que se sometió'l plan parcial de Cabueñes, contra'l que llegaron a presentase 2.828 escritos. Asimesmo insistó en que'l conteníu del Plan Xeneral d'Ordenación Urbana (PXOU) "caltiénse igual".