El TSXA anula'l Plan Xeneral d'Ordenación Urbana de Xixón

El Tribunal Superior de Xusticia d'Asturies (TSXA) ta acabante d'anular el Plan Xeneral d'Ordenación Urbana del Conceyu de Xixón por ser "contrariu a derechu". Esta sentencia acaba de dala a conocer el conceyal d'urbanismu xixonés, Pedro Sanjurjo. La resolución estima la demanda contenciosu-administrativa presentada por cinco particulares contra l'aprobación del 23 de xineru de 2009 del testu refundíu de l'Adaptación de la Llei Autonómica del Suelu y Modificación del PXOU.
 
Según el Tribunal Superior de Xusticia d'Asturies el Conceyu de Xixón "ocultó una operación de Revisión del Plan xeneral baxo un indebíu supuestu de modificación puntual", porque "el conxuntu de les variaciones introducíes esceden lo que representa una modificación puntual y d'axuste a la totalidá del Plan Xeneral, por más qu'afecte a la regulación de dalgunos de los sos ámbitos y aspectos del Plan Xeneral". Por ello "estima les alegaciones de los recurrentes venceyaes al procedimientu a siguir sobre'l deficiente periodu d'información pública anterior a l'aprobación inicial, a la falta de documentos esenciales, y al deficiente estudiu económicu y financieru, por cuenta de la inapropiada tramitación de l'adaptación como una modificación".
 
El Plan Xeneral d'Ordenación Urbana foi mui contestáu dende la so aprobación por dellos sectores de la sociedá xixonesa, enforma nes parroquies rurales. Sicasí, dende'l Conceyu de Xixón afiten que van presentar un recursu contra esta sentencia xudicial.