El PP pide responsabilidaes a Areces pola sentencia del TSXA qu'anula les plantiyes de profesores

Los diputaos del PP na Xunta Xeneral del Principáu Emilio Rodríguez y Ramón García Cañal pidieron que'l presidente autonómicu, Vicente Álvarez Areces, asuma les sos responsabilidaes pola sentencia del Tribunal Superior de Xusticia d'Asturies (TSXA), qu'anula les plantiyes de profesores de los centros públicos non universitarios.

   Según indicaron dambos diputaos en rueda prensa, la reciente sentencia estima'l recursu interpuestu pol sindicatu ANPE contra l'acuerdu del Conseyu de Gobiernu del Principáu del 29 de xineru del 2008,  pol que s'aprobaba la plantiya orgánica de los centros públicos asturianos y "anúlalu, dexándolu sin efeutu por ser contrariu a derechu".

   El sindicatu recurrió l'acuerdu basándose en que l'Alministración debía convocar la mesa de negociación sectorial, na que participen tolos sindicatos con representatividá n'educación, y non sólo na mesa xeneral, na que sólo tán representaos UXT, CC.OO y Usipa.

   Pa Emilio Rodríguez esta sentencia supón un "puntu d'inflexón" nos "desatinos" de l'Alministración del Principáu, que deberá asumir "un xiru total" na so política de personal. Amás, reprochó que'l Gobiernu asturianu lleva tiempu "confundiendo" Mesa Xeneral con meses sectoriales.

   También alvirtió que nengún sindicatu tien capacidá de gobernar, polo que llamentó que l'Executivu va tentar de "pervertir la vida política" utilizando "la coartada" d'UXt y CC.OO, que dixo "nun sirve".

   Asina, entiende la sentencia como una desautorización" de la política de personal "en toa regla", a un error del Gobiernu que califica de "garrafal", y que deberá tener "consecuencies polítiques pal propiu presidente".

   Pela so parte, Ramón Cañal destacó dalgunes sentencies contraries a l'Alministración, como la qu'anuló convocatories d'oposiciones, la de la carrera profesional, la qu'eliminó por "defeutu de forma" l'impuestu de grandes supercicies, y ésta de les meses sectoriales.

   Amás, el diputáu del PP apuntó que demientres los dos últimos años dende'l so grupu encamentó al Gobiernu que negocie en meses sectoriales, n'especial en materia d'educación, por quedar fuera de la Mesa Xeneral los sos sindicatos más representativos.

   Al respeuto, Emilio Rodríguez aseguró que'l PP va tar vixilante pa que se celebren les meses sectoriales que permitan tratar los asuntos propios de cada ámbitu colos sindicatos más representativos. Dende'l partíu de la oposición esperen que vuelva la "normalidá" nes rellaciones ente'l Gobiernu y los sindicatos.