"Les fuerces polítiques propies n'Aragón y n'Asturies" a debate en Xixón

Unidá Nacionalista Asturiana entama pa esti vienres 11 de setiembre una charra na que se tratará'l desarrollu del nacionalismu d'esquierda n'Asturies y Aragón, baxo'l títulu "Les fuerces polítiques propies n'Aragón y Asturies". La cita ye a les 19.30 hores nel Salón d'Actos de la Biblioteca Pública Xovellanos, asitiada na Cai Xovellanos 23 de Xixón y va contar cola presencia de Gregorio Briz, en representación de Chunta Aragonesista, y Faustino Zapico, voceru nacional d'UNA.

Gregorio Briz ye vicesecretariu Xeneral de coordinación y representación institucional de Chunta Aragonesista, amás de miembru del "Consello Nazional" de la organización. Sustituye a Juan Martín Expósito, secretariu xeneral de Chunta, que por problemes d'axenda nun va poder finalmente participar na charra. Briz espondrá la esperiencia aragonesa nel desarrollu d'una fuerza política propia dende un puntu de vista d'esquierda, y ónde tán los problemes colos que se topa la so organización nel desendolcu de la so actividá política. Faustino Zapico será l'encargáu d'esponer el casu asturianu, tanto dende'l puntu de vista históricu como de la situación que vivimos anguaño.

Esta charra enmárcase dientro de los actos d'UNA del Día de la Nación Asturiana. Amás, forma parte d'un ciclu de charres más ampliu denomáu "El nacionalismu d'izquierda nel sieglu XXI", y que va desarrollase los meses entrantes cola presencia de representantes políticos de diferentes partíos nacionalistes d'izquierda.