Mieres inaugurará nel mes d'ochobre el Centru d'Estudios de l'Asturianá

La edil de Cultura del Conceyu de Mieres, Diana González, anunció que l'Ayuntamientu prevé inaugurar el Centru d'Estudios de l'Asturianá, más conocíu como muséu de la toná, el próximu mes d'ochobre. La conceyal esplicó que les obres d'adautación del xalé que va ocupar la instalación yá acabaron y apuntó que nestos momentos tán equipándose la infraestructures, que van contar con espacios pa la investigación, pa llabores alministratives y p'actividaes.

   De fechu, González recordó que será un muséu al usu si nun qu'esti centru aspira a ser un llugar d'alcuentru pa espertos, investigadores y amantes de la canción y la tradición asturiana. La edil de Cultura señaló que la fecha exacta de la inaguruación tovía nun ta decidida pero adelantó que va ser demientres el mes d'ochobre, y prevé poner en marcha dalguna actividá pa celebrar esta abertura.

   González recordó que nestos momentos, a unes selmanes de la inauguración del centru, l'Ayuntamientu de Mieres yá ta trabayando nuna segunda fase del proyectu, cola adautación d'un segundu edificiu anexu al actual y que va centrase más nel conteníu museísticu. La representante municipal calcó na importancia d'esta actuación cultural al plantegar que se trata del "primer centru d'estes característiques se crea n'Asturies".

   Sobre'l trabayu realizáu hasta agora, González recordó que la reforma del edificiu foi fecha al traviés d'una escuela taller y que'l tema del equipamientu y l'acabación de les obres ascendió a unos 200.000 euros, a los que va haber que sumar la partida que s'use pa promover la segunda fase del proyectu.

   La edil de Cultura fizo esti anunciu demientres la presentación de la programación cultural prevista pa les próximes selmanes nel conceyu. Ente les actividaes organizaes destaquen un ciclu de cine documental asturianu, delles presentaciones de llibros y la celebración Memorial y Concursu Silvino Argüelles de música asturiana.