La necesidá de proyectos políticos autóctonos marcó’l debate sobre'l nacionalismu asturianu y aragonés

El vienres día 11 celebróse nel Salón d’Actos de la Biblioteca Pública Xovellanos de Xixón la charra “Les fuerces polítiques propies n'Aragón y n'Asturies”, na que Gregorio Briz pola Chunta Aragonesista y Faustino Zapico por Unidá Nacionalista Asturiana fixeron un repasu a les coincidencies y diferencies ente’l procesu de construcción de proyectos nacionalistes d’izquierda tanto n’Asturies como n’Aragón.
 
Gregorio Briz, vicesecretariu Xeneral de coordinación y representación institucional de Chunta Aragonesista y miembru del so Consello Nazional, relató la evolución hestórica de la Chunta, y como algamaron asitiase como una fuerza estable y de referencia dientro del escenariu políticu d’Aragón, llegando incluso a algamar un diputáu nel Congresu de los Diputaos español. Briz sorrayó la importancia y la necesidá de proyectos nacionalistes d’izquierda  nel estáu español, non solo pola defensa de los intereses nacionales de los distintos territorios, sinón tamién pola necesidá d’una práctica política independiente y llonxe de la corrupción  que recupere la dignidá de les y los políticos. El representante aragonés afaló a los asturianos pa que puxen "pol proyectu d’UNA como ferramienta política", y alvirtió de los riesgos y problemes que provoquen en proyectos d’esti calter les divisiones internes.
 
Pela so parte Faustino Zapico, portavoz nacional de la UNA, fexo un repasu rápidu de la hestoria del nacionalismu asturianu y de los procesos autonomistes dende'l sieglu XIX, que sirvió pa definir les característiques que tien el nacionalismu asturianu anguaño. Zapico tamién rescampló les coincidencies ente los procesos aragoneses y asturianos.

Un debate abiertu colos asistentes de la charra peslló l’actu, que s’encuadró dientro del ciclu "El nacionalismu d'izquierda nel sieglu XXI", que va desarrollase los meses entrantes cola presencia de representantes políticos de diferentes partíos nacionalistes d'izquierda del estáu.