La Universidá abre'l plazu d'inscripción pal tercer cursu d'encuestadores en dialectoloxía, toponimia y cultura popular

La Universidá d'Uviéu abrió güei'l plazu d'inscripción de la tercer edición del cursu de trabayu de campu en toponimia, dialectoloxía y cultural popular, que dirixe'l profesor Fernando Álvarez-Balbuena, cola collaboración y promoción de la Conseyería de Cultura. Asimesmo l'asociación El Teixu entama'l "I Cursu d'Encuestadores de Dialectoloxía y Toponimia", que va desendolcase los díes 19 y 20 de setiembre y 3 y 4 d'ochobre.

No que cinca al cursu d'estensión universitaria, esti entamará'l próximu 6 d'ochobre y prollongaráse hasta'l 11 d'avientu. Lo que busca, básicamente ye formar encuestadores nos mentaos campos. En palabres del propiu Álvarez-Balbuena, "deprenderánse les técniques de lo que ye la encuesta, que puean valir pa esti tipu d'estudios", calcando n'aspectos como'l "tratu" cola xente, "la conocencia de l'asturies rural o la preparación previa del investigador".

Será un averamientu multidisciplinar a les diferentes técniques, estudiando temes como la llingua, el paisaxe, la historia oral, la musicoloxía o la lliteratura, pero siempre dende un puntu de vista etnográficu. La programación tendrá una parte teórica y otra práctica, na que se realizarán encuestes, polo menos una de toponimia y otra de carácter musicolóxicu.

El cursu cuenta con 14 profesores especialistes en caún de les materies a tratar: Adolfo García Martín (etnografía y antropoloxía), Xosé Ambás (musicoloxía y etnografía), Felipe Fernández (xeografía), Irene Díaz Martínez (historia oral), Andrés Miranda y María Antonia Pedregal (organización de tierres y finques), Llinu Álvarez, María Cueto y Fernando Balbuena (dialectoloxía y toponimia), Ramón Sordo Sotres (etnografía y toponimia), Ramón d'Andrés (sociollingüística), Xuan Busto (lliteratura oral), Xulio Viejo (toponimia y historia) y Alba Rodríguez (etnografía).

El preciu de la matrícula ye de 187,68 y el periodu d'inscripción acaba'l día 30 d'esti mes. Les clases serán nel campus del Milán.

I CURSU D'ENCUESTADORES DE DIALECTOLOXÍA Y TOPONIMIA EN ZAMORA

Pela so parte l'asociación "en defensa de la llingua asturiana en tol so dominiu llingüísticu" El Teixu entama'l "I Cursu d'Encuestadores de Dialectoloxía y Toponimia", que va desendolcase los díes 19 y 20 de setiembre y 3 y 4 d'ochobre. l'oxetivu d'esti cursu ye "contribuír a poner les bases teóriques y práctiques que sirvan a los alumnos pa facer el diseñu y la realización de trabayos llingüísticos de campu centraos nes fales de la provincia de Zamora". Pa ello, esta edición primera del cursu "quier familiarizar a los alumnos coles técniques d'investigación de campu en dos disciplines llingüístiques mui rellacionaes: la dialectoloxía (l'estudiu de la variación llingüística nel espaciu) y la investigación toponímica (l'estudiu de los nomes de sitios)".

El cursu, que va contar tamién cola aprticipación del profesor Álvarez-Balbuena, organízase en díaz hores de clases teóriques los díes 19 y 20 de setiembre y vente hores práctiques los díes 3 y 4 d'ochobre. El preciu ye 20€ (15€ pa estudiantes) y inclúi la matrícula, material de trabayu y el gastu en combustible nes clases práctiques. Pa más información y inscripción puede unviase un email a info.elteixu@gmail.com o llamar al teléfonu 695 51 53 86.