El Sporting salva un puntu con un xuegu mediocre

El Sporting podría dicise que salvó un puntu n'El Molinón frente a un Zaragoza que foi meyor a lo llargo de casi tol partíu. Mientres los visitantes dominaron el xuegu, abrieron el campu y llegaron al área en numberoses ocasiones, un irreconocible Sporting limitóse a xugar a arreones, con un centru del campu desapaecíu y un ataque casique inéditu. En definitiva un puntu qu'hai que dalu por bonu.

Entamáu'l partíu bien llueu la grada decatóse de que l'equipu nun funcionaba. El mediucampu taba en manes de los aragoneses dende'l principiu. A partir d'esi dominiu, les internaes peles bandes de los maños, enforma pela d'un magníficu Pennant, llevaron les primeres ocasiones de peligru visitantes. Sicasí, el primer avisu seriu llegaría tres una internada pela banda de Luís Morán, que pente una vaselina dende más de 30 metros casi marca frente un adelantáu Carrizo. A partir d'esi primer sustu pa los visitantes, el partíu foi casi un monólogu d'estos, namás alteráu por ocasiones esporádicques sportinguistes. Nuna d'estes, nel minutu 28, Diego Castro garró'l balón na frontal del área y desplazándose a lo llargo d'esta pegaría un xut  que, desviáu por un defensa, diba colase na portería zaragocista. Un 1 a 0 que ponía entá más al Zaragoza al ataque, anque ensin ser quienes a algamar esi remate final que da'l gol.

Na segunda parte'l Sporting quixo dominar el xuegu, pero namás que foi un espeyismu porque enseguida'l balón volvió a los pies visitantes. Taba más próximu'l gol d'estos que'l de los asturianos, y asina foi nun de los munchos corners que sacaren. Nel minutu 53 Abel Aguilar remató de cabeza mandando'l balón a la rede local. El restu del partíu continuó con dominiu visitante y colos asturianos intentando sorprender a la contra o a balón paráu, como na ocasión más clara del Sporting na que Gregory tuvu a puntu de marcar tres rematar de cabeza y llibre de marca nel área pequeña. Dambos equipos pudieron sumar los trés puntos, pero a la fin llegóse al final del encuentru con tables nel marcador.

Un puntu salváu nun mediocre partíu de los xixoneses. L'ausencia de Michel, l'organizador del equipu, notóse enforma ensin qu'un apagáu Camacho pudiera suplilu. La próxima cita ye en Pamplona esti domingu frente al Osasuna, col handicap de que los dos centrales, Botía y Gregory, nun van poder xugar. Sicasí, ye d'esperar que lo del Zaragoza fuese simplemente un mal día y que los defectos detectaos nesti partíu sirvan pa meyorar.

Ficha Técnica

Sporting de Xixón 1- Real Zaragoza 1

Sporting: Juan Pablo, Lora, Gregory, Gerard, Canella, Diego Camacho, Rivera, Luis Morán, De las Cuevas (Barral m 63), Diego Castro (Maldonado m 85) y Bilic (Kike Mateo m 78)

Zaragoza: Carrizo, Pulido, Ayala, Pavón, Paredes, Gabi (Babic m 52), Ponzio, Pennant (Songó'o m 73), Jorge López, Abel Aguilar y Arizmendi.

Goles: 1-0 (m 28) Diego Castro, 1-1 (m 53) Abel Aguilar

Árbitru: Turienzo Álvarez (vascu). Sacó tarxetes amarielles a Gerard (m 44), Gabi (m 46), Ayala (m 59), Barral (m 73). Gregory foi espulsáu por doble amariella.