El sindicatu d'enseñanza Suatea confirmó que la inspeición educativa solucionó yá'l casu del alumnu del segundu de la ESO d'un institutu de Xixón al que s'escolarizare sin consulta previa na optativa de francés por falta d'alumnos matriculaos n'asturianu, la materia qu'él escoyere. Al paecer, había otros dos estudiantes na mesma situación, colo que decidió formase una clase de trés escolinos de Llingua Asturiana.

La Coordinadora Ecoloxista d'Asturies treslladó al Ministeriu de Mediu Ambiente nel tramite de suxerencies la so "total oposición" al proyectu de la Demarcación de Costes d'Asturies, que baraxa executar la construcción d'una escollera nel ríu Nalón, a l'altura de Monterréi, en Sotu'l Barcu.

La propuesta presentada n'Italia pol partíu derechista Lliga Norte y que prevé una pena d'hasta dos años de cárcel pa les muyeres que lleven burka xeneró un intensu alderique n'Italia.
   La Lliga Norte, que ye ún de los principales aliaos del primer ministru italianu, Silvio Berlusconi, plantégase castigar a les persones que por razones relixoses se les garre 'in fraganti' vistiendo ropa que fai "imposible o difícil el so reconocimientu".

El plenu de les Cortes d'Aragón debatirá el xueves 8 d'ochobre, la toma en consideranza de la proposición de llei del Grupu Socialista pa regular les llingües minoritaries de la Comunidá Autónoma, l'aragonés y el catalán.

Les organizaciones WWF y SEO/BirdLife alertaron sobre los daños ambientales y los "graves problemes", "irreversibles" que causará'l proyectu 'Vía Rápida Suroccidental', una autovía que discurrirá sobre la zona del exe La Espina (Asturies) y Ponferrada (Lleón).

El director del Salón Internacional del Cómic de Xixón, Faustino Rodríguez Arbesú, destacó güei la presencia na edición d'esti añu de dibuxantes como l'americanu Russ Heath, ún de los trés grandes del panorama actual, na so opinión. Tamién destacó la esposición 'Un bon homes, una nueva mirada', que recueye dalgunes de les historietes osbre l'holocaustu nazi. El certame celebraráse del 13 al 17 d'esti mes.

El maxistráu del Penal númberu 1 de Xixón, Lino Rubio Mayo, comunicó a los representantes de la Corriente Sindical d'Izquierdes (CSI), Juan Manuel Martínez Morala y Cándido González Carnero, que tienen un plazu de trés díes hábiles pa esplicar cómo van pagar la indemnización de 5.624,83 euros al Ayuntamientu como condicionante a la rebaxa d'un añu na pena de cárcel.

El director xeneral de Política Forestal, Joaquín Arce, presentó una campaña d'entrega de baldre d'árboles autóctonos en feries, mercaos y nel propiu viveru forestal, pola que'l Gobiernu del Principáu regalará más de 20.000 árboles autóctonos enantes de final d'añu.
 

La Conceyalía de Cultura del Ayuntamientu de Mieres, que preside Diana González, informó de la convocatoria del XIX Premiu Teodoro Cuesta de Poesía, un prestixosu certame, con un palmarés nel que figuren dalgunos de los más destacaos nomes de la lliteratura n'asturianu.
 

El científicu chinu-británicu-estaounidense, Charles K. Kao, y los estaounidenses Willard S. Boyle y George E. Smith son los galardonaos col Premiu Nobel de Física 2009 poles sos investigaciones que permitieron el desarrollu de les comunicaciones per fibra óptica y de la tresmisión d'imaxes per vía dixital, según informó esti martes la Real Academia Sueca de les Ciencies.