Dientro de les actividaes previstes pa esti xueves n'Arribada, la editorial Araz Llibros va presentar a les 18:30 hores nel Centru Antiguu Institutu de Xixón la obra “Mal de llingües. Alredor de los prexuicios llingüísticos” de Jesús Tuson Valls, caderalgu de llingüística de la Universitat de Barcelona, nuna traducción d’Héctor Gil. Esta obra, rigurosa y amena, ye una defensa de la diversidá llingüística de la humanidá y algamó les 29 ediciones en catalán.

Hai yá venti años que’l sociollingüista Jesús Tusón, autor d’obres perimportantes nesti ámbitu, espublizó en catalán Mal de llengües; un llibru col que de manera seria y bien didáctica combate los prexuicios llingüísticos. Nel prólogu a esti llibru, Héctor García Gil afita que “dende l’argumentación y la razón” va desmontando “caún de los tópicos y prexuicios negativos existentes na sociedá contra les otres llingües, aquélles que nun son «la nuestra» –o la del poder–, y sobre manera contra aquélles que dan en llamar «pequeñes», «rexonales»... Frente a ello, l'autor quier facenos ver lo absurdo y irracional d’esti discursu a traviés de les contradicciones esencialistes nes que caen los xeneradores de prexuicios, por más que dellos querian vistilu o amazcaralu de técnico y racional”.

L’autor, Jesús Tuson Valls (Valencia, 1939) ye profesor de llingüística y caderalgu de la Facultá de Filoloxía na Universitat de Barcelona.Ye autor, ente otres, d’obres como Lingüística: una introducción al estudio del lenguaje (1984), El luxe del llenguatge (1986), Mal de llengües (1988), L’escriptura (1996), Històries naturals de la paraula (1998), ¿Com és que ens entenem? (1999), Una imatge no val més que mil paraules (2001), Patrimoni Natural (2004) y Això és (i no és) Allò (2008).

Esta obra fai'l cuartu títulu publicáu por Araz Llibros, tres "Llingua estándar y normalización llingüística. La revitalización de les llingües subordinaes" David Guardado Diez; "El nacimientu d'una nación. Historia de Sudáfrica" de Faustino Zapico Álvarez; y "Dos visiones asturianes de les nueves tecnoloxíes" de Xabiel García Pañeda y Rubén Sánchez Antuña.