El PSOE, apoyáu pol PNV y Coalición Canaria, derrotó esti miércoles nel Congresu les enmiendes de totalidá que'l PP, CiU y UPyD, ERC-IU-ICV y el BNG presentaren contra'l proyectu de Presupuestos Xenerales del Estáu pal 2010.
 
Na votación celebrada nel Plenu del Congresu, les enmiendes que pidíen la devolución del proyectu al Gobiernu apoyáronles 168 diputaos de PP, CiU, ERC, IU-ICV-BNG y Nafarroa Bai, pero nun salieron alantre. al derrotales una mayoría formada por PSOE, PNV y CC (177 votos). El diputáu d'UPN, Carlos Salvador, optó por astenese.
 

El director de l'Axencia Asturiana de Cooperación al Desarrollu del Principáu d'Asturies, Rafael Palacios, exixó güei a delles instancies del Gobiernu de Marruecos la puesta en llibertá de siete defensores saharuis de Derechos Humanos deteníos nel aeropuertu de Casablanca'l pasáu 8 d'ochobre, tres visitar los campamentos de refuxaos saharauis de Tinduf.
 

L'ex ministru de Fomentu, Francisco Álvarez Cascos, denunció ante l'Axencia Española de Proteición de Datos al PP de xixón por tirar a la basoria un archivu que contenía datos personales suyos. Los documentos atopólos el pasáu mes d'abril un vecín de Xixón nun contenedor d'escombrios asitiáu na acera de la sede de los populares.
 
Asina lo recueyen güei dellos diarios asturianos, qu'añaden que l'abogáu de Francisco Álvarez Cascos considera que l'actuación de la xunta llocal del PP de Xixón pue ser constitutiva d'una irregulardiá "mui grave".
 

La casa natal del Padre Galo (Fernán Coronas), en Cadavéu (conceyu de Valdés), acoyerá esti sábadu la primer Xunta d'Escritores en Llingua Asturiana, qu'entamen conxuntamente l'Ayuntamientu y la Dirección Xeneral de Política Llingüística de la Conseyería de Cultura. L'eventu axuntará a dellos importantes nomes de la lliteratura asturiana p'aldericar y trabayar alrodio de la escritura y la llectura de testos llilterarios n'asturianu, amás de valir d'homenaxe a los escritores llocales Padre Galo y Nené Losada.
 

La Plataforma contra la Represión y poles Llibertaes concentraráse mañana miércoles dia 21 d'ochobre a les 19.30 hores, na Plaza del Ayuntamientu de Xixón n'apoyu a los sindicalistes Cándido y Morala, según informó la plataforma nuna nota prensa.
 

Batasuna ta plantegando a les sos bases la posibilidá d'abrir una etapa "sin nenguna violencia nin metedura esterna" tres evaluar el periodu trescurríu dende'l fallíu procesu de negociación col Gobiernu de José Luis Rodríguez Zapatero, un periodu analizáu dende la "autocrítica" polos problemes de "cohesión interna" de la 'izquierda abertzale'.
 

La responsable del Área de Proyectos de la Federación Asturiana d'Empresarios (FADE), María Montes, apuntó güei que falta cultura innovadora, según constata nun estudiu realizáu por ellos en collaboración con otres instutciones internacionales. Montes llamentó que la innovación munches veces tien un carácter "poco estratéxicu", ye dicir, que s'innova si hai fondos, pero nun ta integráu na estratexa de la empresa.

El presidente del Grupu asturianu Alimerka, Alejandro Fernández, anunció güei que la cadena buscará duplicar los 174 supermercaos colos que cuenta nesti momentu pa tornar nos próximos años nun grupu de distribución nacionales y rentabilizar asina los casi 60 millones d'inversión que destinó al so nuevu centru lloxísticu, nel conceyu de Llanera.

La diputada nacional y presidenta del PP en Xixón, Pilar Fernández Pardo, insinuó que pue haber un pactu tapecíu ente'l Principáu, l'Autoridá Portuaria de Xixón, el Ministeriu de Fomentu y la Comisión Europea pa qu'El Musel torne nun puertu "refuxu o vertederu", y entrugóse si tendría que ver colos escesos de coste o pa compensar "les irregularidaes" cometíes na ampliación, según ella.

Les matriculaciones d'automóviles nel Principáu d'Asturies algamaron les 900 unidaes nos 15 primeros díes d'ochobre, lo que supón una subida del 51,5 por cientu con respeuto al mesmu periodu del 2008, según datos del Institutu d'Estudios d'Automoción (IEA), facilitaos pola Asociación Nacional de Vendedores de Vehículos a Motor (GANVAM), que representa a 2.400 concesionarios y 3.000 compraventes. Nel conxuntu d'España, les ventes aumentaron un 27,8 por cientu, hasta algamar les 37.265 unidaes nesta quincena.