Les XXVIII Xornaes Internacionales d'Estudiu de l'Academia de la Llingua Asturiana entamen esti próximu martes 3 de payares na Facultá de Filoloxía de la Universidá d'Uviéu hasta'l xueves 5. Estes xornaes, yá clásiques, pretenden afondar nel conocimientu d'aspectos llingüísticos, sociollingüísticos y lliterarios del dominiu llingüísticu asturianu, y pa ello cuenta con espertos d'Asturies y internacionales.

Gonzalo Urquijo, director xeneral d'ArcelorMittal, dixo que dende la multinacional tan estudiando la posibilidá d'ampliar seis meses la duración del espediente de regulación d'empléu (ERE), que ta aplicándose dende esti branu pasáu y qu'afecta a les dieciseis plantes del Estáu, incluyíes les asturianes de Veriña y Avilés.

Daniel Fernández Blanco, voceru de Vivienda d'Unidá Nacionalista Asturiana, manifestó la sorpresa de los nacionalistes pol alcuerdu ente'l Principáu y los promotores privaos. Dende'l puntu de vista d'UNA nun pue creese que "usen fondos públicos pa que la ciudadanía tenga que mercar pisos un 10% más caros que los de protección oficial" y manifestó que nun tien xacíu que Noemí Martín, conseyera de Vivienda afirme que ye una "política social de vivienda".

La Xunta pola Defensa de la Llingua Asturiana denunció "l’arrequexamientu de la llingua asturiana nes campañes de promoción entamaes pol Conceyu Xixón, lo que non solo incumple lo previsto na Ordenanza Municipal sobre l’usu de la Llingua Asturiana sinón, inclusive, la toponimia oficial aprobada cuantayá pol Conceyu y pol Gobiernu asturianu".

El ministru d'Educación, Ángel Gabilondo, y el conseyeru d'Educación y Ciencia del Principáu d'Asturies, José Luis Iglesias Riopedre, tan acabante de firmar el conveniu pa la puesta en marcha del programa Escuela 2.0 nel nuesu país, que supondrá una inversión de 3,87 millones d'euros y beneficiará a más de 7.000 alumnos demientres el presente cursu.

Dende l'Asociación Cultural Xeira conseñen que "fiel al so compromisu col patrimoniu cultural y ecolóxicu del occidente asturianu, apoya'l contenciosu alministrativu qu’acaba d'entamar la Coordinadora Ecoloxista d’Asturies contra'l Plan Especial del Parque Eólicu Sierra de Carondio" que s’aprobó en setiembre d’esti añu.

El Serviciu de Normalización Llingüística de la Mancomunidá, col envís d'editar un llibru-cartafueyu qu'antologue la lliteratura n'asturianu que se ta escribiendo anguaño na Comarca de la Sidra, convida "a tolos escritores de la comarca interesaos en participar a unviar les sos participaciones en forma de poesía, con una estensión perbaxo de los 100 versos, o rellatu breve de trés fueyes como máximu".

El grupu d'Unidá Nacionalista Asturiana nel conceyu de Xixón da anuncia de la celebración d'una nueva Tertulia Pachín de Melás al rodiu del mundu sindical. La tertulia, que se presenta sol títulu "El sindicalismu del sieglu XXI" va cuntar cola presencia de Juan Manuel Martínez Morala, militante históricu del sindicatu CSI; José Luis Llera, secretariu xeneral del sindicatu USO en Xixón y Beatriz Quirós, vocera del sindicatu SUATEA.
 

La Xunta de Personal Docente non Universitariu d'Asturies, aconceyada ayer, aprobó ente otres resoluciones el sofitu al plan d'estudios p'algamar el Minor en Llingua asturiana, propuestu pola Facultá de Filoloxía de la Universidá d'Uviéu, asina como otra resolución na que se pidi l'aceleración de los planes de formación del profesoráu de gallego–asturiano pa poder atender "les necesidaes docentes que continuamente surden nesta especialidá".

Dende la Coordinadora Ecoloxista denuncien que "se machaca a los ciudadanos conque'l basureru de residuos urbanos de Zoreda acábase, cuando compruébase fácilmente esta falsedá con una vista aérea de les instalaciones, la disposición de terrenos que tien Cogersa alredor".Segun la CEA "hai que recordar que'l complexu de Zoreda ocupa terrenos de Xixón, Carreño y Llanera y Cogersa y tien terrenos abondos pa tirar de forma afayaíza los residuos urbanos non aprovechables agora y los de munchos años más".