FADE constata nun estudiu que falta cultura innovadora como parte de la estratexa empresarial n'Asturies

La responsable del Área de Proyectos de la Federación Asturiana d'Empresarios (FADE), María Montes, apuntó güei que falta cultura innovadora, según constata nun estudiu realizáu por ellos en collaboración con otres instutciones internacionales. Montes llamentó que la innovación munches veces tien un carácter "poco estratéxicu", ye dicir, que s'innova si hai fondos, pero nun ta integráu na estratexa de la empresa.
   Pese a ello, señaló que n'Asturies hai munches empreses que faen coses mui interesantes pero que se conocen poco. Montes apostó por ver qué pasa nes empreses y trabayar cola xente mozo, que son los futuros emplegaos de les compañíes. Asina lo dixo a los periodistes dempués de presentar el resultáu del proyectu Inovages XXI, un estudiu sobre'l xestor de la innovación del sieglu XXI nel Paraninfo de La Llaboral.
   De la mesma manera, indicó qu'anque na rellación Universidá-Empresa avanzóse muncho nos últimos años, siguen siendo "mundos diferentes" que ye necesario unir más. "A veces conozse poco lo que se fai na Universidá o la empresa nun sabe lo que la Universidá pue ofrece-y", dixo. Sicasí, punxo d'exemplu de collaboración la conexón ente'l Parque Científicu y Tecnolóxicu de Cabueñes, la Universidá Llaboral y el campus de Viesques.
   D'otru llau, remitióse al estudiu realizáu pa indicar que debe haber un mayor esfuerzu per parte de les Alministraciones Públiques pa espardir de manera más eficaz la importancia de la innovación pa la competitividá empresarial y diferencial claramente de la I+D. De la mesma manera, deben promover col exemplu, favorecer una formación apropiada, canalizar los recursos de cara a potenciar la innovación y conocer más fonderamente les necesidaes de les empreses.
   L'estudiu tamién propón que los trabayadores s'impliquen más na innovación y muestren una mayor receptividá hacia'l cambiu, asina como romper coles idees preconcebíes qu'existen sobre'l riesgu de plantegar idees nueves y reforzar el compromisu por deprender sobre creatividá y innovación.
   A los empresarios, amás d'introducir la innovación dientro de la estratexa empresarial, plantégase-yos fomentar la visibilidá de los puestos de director o xestor d'innovación, que deberán, ente otres coses, estimular el desarrollu real de la capacidá creativa de la organización, ser preactivos nel desarrollu del so perfil profesional, adautase al cambiu continu y demostrar dafechu'l so valir, ambición y que nun los puea vencer el "desaliendu", al traviés d'abondes actividaes de 'lobby' internu.
   Montes señaló que paralelamente a esta xornada sobre'l perfil del xestor de la innovación desarrollaránse trés talleres práctivos de creatividá que son, según el, "un enganche diferente pa los asistentes". Na xornada ta prevista l'asistencia d'unes 130 persones. De la mesma manera, indicó que nel proyectu, qu'acabará nunes selmanes, collaboraron la Fundación Universidá Empresa Gallega (Feuga), l'Asociación d'Empresarios de Santarem (Nersat) en Portugal y la Cámara de Comerciu d'Industria de Mersin en Turquía.