Pardo piensa qu'hai un pactu con Fomentu y la UE pa qu'El Musel seya puertu refuxu por culpa de los escesos de coste

La diputada nacional y presidenta del PP en Xixón, Pilar Fernández Pardo, insinuó que pue haber un pactu tapecíu ente'l Principáu, l'Autoridá Portuaria de Xixón, el Ministeriu de Fomentu y la Comisión Europea pa qu'El Musel torne nun puertu "refuxu o vertederu", y entrugóse si tendría que ver colos escesos de coste o pa compensar "les irregularidaes" cometíes na ampliación, según ella.
   Pardo remarcó'l fechu de que nin al conseyeru d'Infraestructures, Franciso González Buendía, nin al presidente de l'Autoridá Portuaria, Fernando Menéndez Rexach, nin a l'alcaldesa de Xixón, Paz Fernández Felgueroso, diba sorprende-y la noticia, polo que "dalgo taba caciplando per detrás". "El PP opónse a que seya puertu vertederu", dixo.
   Según ella, al ministru "escapóse-y" esti plan pal puertu xixonés demientres la so declaración nel Congresu'l pasáu miércoles. Tamién insistió en que toos ellos tán tapeciéndolo. "Ábrese una nueva incógnita y nueves responsabilidaes", indicó. De la mesma manera, indicó qu'a lo meyor no que se trabaya na ampliación d'El Musel ye pa ser puertu refuxu y non p'aumentar los tráficos y dinamizar la eocnomía asturiana.
   Pardo encamentó tamién a RExach que nun confunda términos cuando fala de que l'orixe primitivu d'El Musel yera ser puertu refuxu de la costa asturiana. La diputada nacional esclaró qu'una cosa ye que se produza un accidente cerca de la costa xixonesa y El Musel puea acoyer el barcu en peligru y otra ye la denominación de puertu refuxu, que ye más amplia.
   Amás, replicó a Rexach que nenguna de les entrugues realizaes pol PP sobre l'ampliación recibió contestación. "Nin sordos, nin ciegos, pero sobre too mudos nun somos", respondió-y sobre la so indicación de que nun hai peor sordu que'l que nun quier oyer.
   Pa la representante popular esta afirmación de Rexach ye "mui poco acertada", especialmente si provién d'ún de los máximos responsables de los esceoss de coste y añadió que si El Musel nun recibe fondos de la UE será por "les irregularidaes" de les obres.
MOCIÓN
   D'otru llau, esplicó que'l PP presentó una Moción consecuencia de la Intepelación urxente al Gobiernu, pa que'l ministru de Fomentu, José Blanco, vuelva declarar nel congresu y pa qu'entreguen a los grupos parlamentarios tola documentación sobre l'ampliación d'El Musel. Pardo matizó que la diferencia d'esta comparecencia ye que dempués va votase sobre l'asuntu y pidió l'apoyu de tolos grupos parlamentarios.
   Na moción presentada, el PP encamienta al Gobiernu qu'esclare les circunstancies que motivaron los escesos de coste, asina como a qu'entregue a los grupos parlamentarios una serie de documentación, como ye l'espediente completu de l'axudicación. Esti últimu debe incluyir los pliegos de prescripciones alministratives, el de condiciones técniques, l'acuerdu o conveniu formáu por HC pa la esplotación de la cantera, l'informe técnicu d'axudicación o l'espediente correspondiente al modificáu.
   Amás, solicita toles certificaciones d'obra realizaes dende l'entamu, colos documentos contables presentaos pola UTE y los de l'Autoridá Portuaria, el documentu de l'auditoría de la Intervención Xeneral de l'Alministración del Estáu y del Tribunal de cuentes Européu. El Gobiernu tien un mes de plazu pa entregar la documentación.
CONTINUAR INVESTIGANDO
   Nesti puntu, Pardo afirmó qu'hai motivos pa siguir investigando y animó a "nun matar al mensaxeru", dao que'l PP sólo alerta de les "irregularidaes", pero quier qu'acaben les obres y que la UE nun retire los fondos.
   De la mesma manera, dao que Blanco convidóla a dir a los tribunales, retrucó que lo primero ye pidir nel Congresu esplicaciones, que s'entame una investigación na Cámara y que seya'l propiu Gobiernu'l qu'encamiente a la Fiscalía qu'investigue si s'aprecien "irregularidaes o illegalidaes".
   En cuanto a la última declaración de Blanco, indicó que'l ministru "echó balones fuera". Poro, amás de la moción pa una nueva comparecencia, que se producirá nel plenu del Congresu'l día 27, formularánse otra serie d'entrugues, tanto orales como per escrito, na Comisión de Fomentu.
   Ente les entrugues que se formularán, ta si El Musel ta especialmente destináu a acoyer buques en peligru y, si ye asina, quién tomó la decisión, si s'ofreció dalguna contraparida y si ésta pue ser el préstamu concedíu, si s'estudiaron los posibles riesgos medioambientales o pa les persones y la flota pesquera. Tamién s'entrugó Pardo sobre por qué, si El Musel formará parte d'una autopista de la mar, nun se garró a Nantes como puertu refuxu.
   Amás, nesa mesma comisión, al marxe de que respuenda a les entrugues el ministru, pidiráse la comparecencia del presidente de Puertos del Estáu, Gonzalo Laxe, y de la secretaria d'Estáu de Tresporte, Concepción Gutiérrez del Castillo.