Esta selmana aconceyó’l xuráu del XVIII Concursu de "Cuentos Curtios El Garrapiellu", que nesta edición foi pa José Luís Rendueles, ganador col rellatu "Lentu". El primer premiu ta dotáu con 900 euros. El xuráu decidió, amás, dar un accésit de 300 euros al rellatu "(Solo) un besu", de Pablo Texón Castañón.
 

Ruma Barbero resultó ganador de la primer edición del Premiu de cómic en llingua asturiana “Alfonso Iglesias”, que concede la Conseyería de Cultura. El xuráu que concedió esti galardón aconceyó esti xueves a les 13.00 hores na sede de la Conseyería de Cultura y Turismu baxo la presidencia de la Directora Xeneral de Política Llingüística, Consuelo Vega Díaz.
 

Xosé Lluis García Arias algamó ayeri la cátedra de Llingua Española (Dialectoloxía Hispánica) de la Universidá d’Uviéu ventidos años dempués d’intentalo por primer vez. Arias, ún de los “pas” del movimientu de reivindicación llingüística, yá concurriera a la oposición en 1987, con un tribunal integráu por “sensatos y pensantes” como Gregorio Salvador, Emilio Alarcos y Josefina Martínez. D’aquella nengún de los cinco miembros del tribunal votaron por Arias, otorgando-y la cátedra a Francisco García González, yá fallecíu.

Aprovechando la celebración del Festival Liet 09 na ciudá frisona de Ljouwert, un representante de la XDLLA caltuvo una entrevista col xurista y diplomáticu Alexei Kozhemyakov, máximu representante del Secretariáu de la Carta Europea de les Llingües Minoritaries del Conseyu d’Europa. Nella, túvose la oportunidá de "falar n’estenso de la situación de la llingua asturiana en xeneral, y de la falta de derechos de los sos falantes en particular".

La asociación zamorana Furmientu vien d’amosar el so descontentu pola falta de respuesta de la Xunta de Castiella y Lleón sobre’l cumplimientu del artículu 5.1 del Estatutu, onde se fala de la protección, usu y promoción del lleonés. Furmientu diz que l’alministración castellano-lleonesa sigui “xorda ente lo que ye un imperativu llegal aprobáu poles nueses Cortes y una creciente demanda social”, amás d’agradecer l’interés mostráu pol Procurador de lo Común “y el so celu nel desempeñu de la so función”.

El biólogu molecular del Institutu Européu de Bioinformática de Cambridge, Xosé María Fernández, dixo que tenía muncho procuru coles pallabres qu’usa al escribir testos científicos n’asturianu, yá que ye consciente que ta ufriendo propuestes de léxicu y que lo qu’él propón, el día de mañana podría ser usáu pa dar Conocimientu del Mediu “o cualesquier materia” nel nuesu idioma.

La directora xeneral de Política Llingüística de la Conseyería de Cultura del Gobiernu asturianu, Consuelo Vega, calcó na "mui fuerte política" de promoción del asturianu que, según comentó, l'Executivu autonómicu vien desarrollando nes últimes décades. Dende'l so puntu de vista, esti llabor nótase nuna mayor presencia de la llingua na vida social y cultural, y nos medios de comunicación.

El xerente de Coxersa, Santiago Fernández, indicó güei na Xunta Xeneral del Principáu que "nesti momentu Coxersa nun recibió tovía nenguna instrucción" pa ponese a trabayar na puesta en marcha de la Planta de Valorización Enerxética, más conocida como la incineradora de Serín.

La Sociedá Xeneral d'Autores llevará a xuiciu esti mes al Conceyu de Cabranes, al que reclama 7.499,30 euros en conceutu de derechos d'autor por una serie d'actuaciones musicales celebraes nesti conceyu ente los años 2002 y 2008. La demanda afecta en primer llugar a les orquestes de les verbenes de les fiestes de San Francisco, y en segundu a actuaciones incluyíes na Axenda Cultural del Principáu d'Asturies, correspondiendo tamién una mínima parte a actuaciones tradicionales de bandes de gaites y grupos de folk.