El Conseyu de la Mocedá d’Uviéu, tres una iniciativa de Fai!, vien d’aprobar una propuesta de resolución sobre la "Ordenanza Cívica de Convivencia Ciudadana". Nella, esplícitase que van pidir una entrevista cola Conceyala de Seguridá Ciudadana d’Uviéu, Concepción García Álvarez, na que-y van treslladar les postures del Conseyu sobre la norma. El CMU, según anuncia Fai! al traviés d’un comunicáu, comprometióse a facer un actu artístico-reivindicativu nel que se va pintar la fachada del Conseyu p’amosar la so refuta “a la metodoloxía de les multes y les porres que Gabino quier pa Uviéu”.

Juan Pablo evitó’l desastre en Chapín y fixo que’l Sporting lleve yá seis selmanes ensin perder. L’equipu xixonés dominó nel primer tiempu, estrellando dos balones nos postes, pero’l Xerez lluchó enforma na segunda parte, faciendo méritos pa una victoria que Juan Pablo evitó con grandes paraes. Keita foi’l que más fixo por marcar gol per parte del Xerez. L’equipu xixonés sumó un puntu que xunto’l restu de resultaos de la xornada permiten que’l Sporting quede na séptima plaza.

Unión Progreso y Democracia (UPyD) quier que la Constitución española nun reconoza la protección y respetu a la pluralidá llingüística del Estáu, amás d’incluyir la llingua como elementu de non discriminación, equiparable al racismu. Asina lo aprobó nel so I Congresu, onde s’afitaron les llinies maestres de la so estratexa política y onde Rosa Díez foi reelixida como dirixente del partíu col 81% de los votos.

Los miembros del Cornwall County Council (Conseyu de Cornualles) votaron a favor de que los carteles de les cais y carreteres apaezan en córnicu ya inglés. Anque’l billingüismu namás va aplicase a les señales de nueva instalación y les que yá funcionen nun van ser camudaes, pa qu’asina la midida nun suponga un sobrecoste pa les arques del Estáu. El Conseyu señaló, énte les crítiques de los conservadores, que tien la obligación llegal de promover la llingua y que quier tener en cuenta’l córnicu nel so día a día.

Ö-3-3 (Otres trés) va ser el nome de primer discu de llarga duración del grupu de ska-reggae La Tarrancha. Editáu por Algamar Producciones y grabáu nos Estudios Tutu por Sergio Rodriguez, cuenten sacalu a la cai a entamos d’avientu. Según el grupu va ser un discu eclépticu formáu por doce temes onde la banda amuese’l so peculiar y personal estilu. Pel momentu la banda ufre los temes “A la lluna” y “La Nueche que t’alcontré” nel so MySpace como adelantu del discu.

El Vaticanu fizo güei públicu’l nomamientu pol Papa Benedicto XVI del nuevu Arzobispu Metropolitanu d’Uviéu, Jesús Sanz Montes. El sustitutu de Carlos Osoro ye un madrileñu de 54 años, l'Arzobispu más mozu del Estáu, qu’hasta agora yera obispu de Xaca y Huesca. Montes tomará posesión del so cargu na segunda quincena de xineru.

Ecoloxistes n’Aición d’Asturies vien de denunciar l’apaición de niveles altos de mercuriu nos regatos d’El Muselín y La Piquera, na parroquia xixonesa de Xove. Con estos datos, los ecoloxistes aprovechen pa denunciar les emisiones a l’atmósfera d’esti metal pesáu xeneráu polos centrales térmiques de carbón, “que son la fonte más importante de contaminación por mercuriu y que los gobiernos nun regulen”, esclarien. Según los sos propios estudios, en 1998 n’Asturies emitiéronse más de 300 kg de mercuriu a l’atmósfera.

 L'Asociación Foru pola Memoria entamará mañana "la execución del fueyu común" de Cabal.leros próximu a la población ayerana de Felechosa, na que se pretenden "alcontrar, identificar y desenterar los restos de parte de les persones desapaecíes naquella zona de magar 1937".
  

La ciudá occitana de Tarba acueye esti vienres y sábadu un importante congresu européu que lleva por títulu "La tresmisión natural y familiar de la llingua occitana y de les llingües rexonales y minoritaries n'Europa", y nel que van participar, xunto a espertos occitanos, representantes d'otres minoríes llingüístiques europees como galeses, bretones, vascos, gallegos, irlandeses, araneses o de la minoría sueca en Finlandia.

El titular del Xulgáu de lo Penal númberu 1 de Xixón, Lino Rubio Mayo, refugó les alegaciones de los dos sindicalistes, Juan Manuel Martínez Morala y Cándido González Carnero, nes que señalaben que'l xuez "sobrepasare" les sos funciones na interpetación del indultu parcial. L'autu, nel que se señala que la interpretación foi l'apropiada, recurrióse güei.