Xosé Lluis García Arias algamó ayeri la cátedra de Llingua Española (Dialectoloxía Hispánica) de la Universidá d’Uviéu ventidos años dempués d’intentalo por primer vez. Arias, ún de los “pas” del movimientu de reivindicación llingüística, yá concurriera a la oposición en 1987, con un tribunal integráu por “sensatos y pensantes” como Gregorio Salvador, Emilio Alarcos y Josefina Martínez. D’aquella nengún de los cinco miembros del tribunal votaron por Arias, otorgando-y la cátedra a Francisco García González, yá fallecíu.

Ayeri, tolos componentes d’un tribunal formáu por caderalgos de cinco universidaes españoles votaron al so favor. En 1987 Arias recurriera’l fallu del tribunal pola “enemistá y antipatía manifiesta” de trés de los miembros, pero nin la Universidá nin la xusticia dieron-y la razón.
 
Xosé Lluis García Arías ñaz en Teberga en 1945. Llicencióse en Filoloxía Románica na Universidá d’Uviéu cola tesis doctoral “El habla de Teberga. Sincronía diacronía e introducción a la toponimia”. Foi un de los trés fundadores de Conceyu Bable y presidente de l’Academia de la Llingua Asturiana dende 1980 hasta’l 2000, cuando la institución presentó’l diccionariu completando la normativización básica del asturianu. Anguaño ye consideráu ún de los mayores espertos mundiales n'etimoloxía de llingües romániques.