La Fundación Caveda y Nava va celebrar la so sétima Xornada anual el próximu 28 de payares nel conceyu de Villaviciosa cola novedá del nomamientu de Vicente Gotor, Rector de la Universidá d'Uviéu, como Patronu d’Honor de la Fundación. Un nomamientu que se xunta al d'otros patronos d’Honor anteriores como Javier Uría Maqua, Enrique Castro “Quini”, Hugo Morán, Pilar Fernández Pardo, Gabino Diaz Merchán, Carmen Ruiz-Tilve, Emilio Marcos Vallaure o Paloma Uría.

El 3 de xunu del 2008, el Conceyu Abiertu pola Oficialidá presentó una campaña bien novedosa: “Doi la Cara pola Oficialidá”, que consiste na recoyida masiva y esposición per Internet de semeyes individuales de persones retratándose con un mesmu cartel, que lleva’l testu que da nome a la campaña.
 

Unidá Nacionalista Asturiana ta acabante de presentar un recursu contra'l proyectu d'instalación d'una térmica nel conceyu de Corvera. Pa esta formación "ye discriminatorio qu'esta mena d'instalaciones se refugaren por motivos ambientales n'otres partes del estáu con un aire menos contaminao que lo de Corvera".

El presidente de la Xunta de Galicia, Alberto Núñez Feijoo, afitó que la TVG va seguir viéndose nes “zones gallegofalantes que formen parte de les comunidaes autónomes d’Asturies y de Castiella y Lleón”. El xefe del executivu gallegu fizo estes declaraciones demientres el Conseyu Asesor de Telecomunicaciones y Audiovisual de Galicia, onde esclarió que la canal pública gallega tien ente los sos principales funciones “la promoción y defensa de la cultura y l’idioma gallegu”.

Conocíos representantes de la música tradicional asturiana espresaron esta selmana la so esixencia a la Sociedá Xeneral d'Autores pa que realice peritaxe y mayores controles de les obres que se rexistren, a fin d'evitar que determinaes persones s'atribuyan los derechos d'autor de conocíos temes anónimos. Sicasí'l gaiteru José Ángel Hevia, directivu de la entidá, niega qu'exista esti problema y recalca que la SGAE sólo cobra derechos por arreglos o versiones de temes tradicionales rexistraos por otros grupos.

El Serviciu de Salú del Principáu d'Asturies emprincipia esti llunes la campaña de vacunación contra'l gripe A. Anguaño 102.000 vacunes yá tan distribuyíes nos centros de salú d'atención primaria, llugar onde van vacunase les persones que lo soliciten previa cita.Esta enfermedá supunxo un aumentu del 16 por cientu nes baxes llaborales durante la última selmana.

El colectivu de voluntarios Softastur ta acabante de completar la torna al asturianu de la suite ofimática OpenOffice.org. La versión nueva tará a disposición de los usuarios de cualisquier sistema operativu (GNU/Linux, Windows, Mac Os, etc) a partir de la versión 3.2 d’esti paquete de ferramientes informátiques, que s’espublizará en próximes feches.

La Facultá de Filoloxía de la Universidá d’Uviéu va acoyer la celebración del Congresu Internacional “El patrimoniu oral d’Asturies. Balances y perspectives”. Les conferencies van tener llugar nel Salón de Conseyos del Departamentu de Filoloxía Española demientres esti martes 17 de payares y hasta’l día siguiente.
 

El Conceyu de L.lena, en collaboración cola Conseyería de Cultura, ta acabante de convocar una edición nueva del Premiu Internacional de Cuentos. Dotáu con tres mil cinco euros, a él pueden presentase obres en castellanu y asturianu de tema llibre, qu'han de ser obligatoriamente inédites y nun tar premiaes anteriormente nin con compromisu nengún d’edición. La so estensión máxima tien de ser d’ocho fueyes (tamañu DIN-A4, escritos per una cara namás) a razón de 32 llinies de 70 caracteres aproximadamente.

Miguel Allende ye'l ganador de la decimoquinta edición del Premiu de poesía en llingua asturiana "Xuan María Acebal", entamáu pola Conseyería de Cultura. El xuráu que concedió esti galardón aconceyó esti vienres a les 13.00 hores na sede de la Conseyería de Cultura baxo la presidencia de la Directora Xeneral de Política Llingüística, Consuelo Vega Díaz. Formaron parte del mesmu los escritores José Luis Argüelles, José Luis García Martín y Ana Vanessa Gutiérrez. Otros seis poemarios presentáronse a esti premiu, dotáu con 7000 euros.