La Xunta aconceyó col máximu representante del Secretariáu de la Carta Europea de les Llingües Minoritaries del Conseyu d’Europa

|

Aprovechando la celebración del Festival Liet 09 na ciudá frisona de Ljouwert, un representante de la XDLLA caltuvo una entrevista col xurista y diplomáticu Alexei Kozhemyakov, máximu representante del Secretariáu de la Carta Europea de les Llingües Minoritaries del Conseyu d’Europa. Nella, túvose la oportunidá de "falar n’estenso de la situación de la llingua asturiana en xeneral, y de la falta de derechos de los sos falantes en particular".

Segun la XDLLA, Alexei Kozhemyakov "demostró’l so conocimientu y preocupación pola situación del asturianu, faciendo una esposición de les acciones y actividaes que va desarrollar el Conseyu pa favorecer el cumplimientu de la Carta polos estaos firmantes. Recordó que l’español ye ún de los 23 estaos firmantes hasta’l momentu y, polo tanto, ye responsabilidá d’él cumplir esi testu".

De la mesma manera, insistió na recomendación inequívoca del Comité de Ministros, del Comité d’Espertos y del Conseyu d’Europa de "la declaración del asturianu como llingua oficial. Dende’l so puntu de vista, resulta inesplicable que l’Estáu respete los derechos llingüísticos de los ciudadanos nunos territorios y n’otros non".

Dende la Xunta pola Defensa de la Llingua Asturiana, por cuenta d’estes declaraciones tan importantes, volvióse a reclamar a "les instancies competentes del Estáu, como firmante de la Carta Europea, y a les autonómiques, como responsables directes de la política llingüística, el cumplimientu dafechu del tratáu firmáu y de la recomendación de la oficialidá de la llingua asturiana".

Contador Estadistiques