Ruma Barbero algama'l Premiu de cómic n'asturianu “Alfonso Iglesias”

|

Ruma Barbero resultó ganador de la primer edición del Premiu de cómic en llingua asturiana “Alfonso Iglesias”, que concede la Conseyería de Cultura. El xuráu que concedió esti galardón aconceyó esti xueves a les 13.00 hores na sede de la Conseyería de Cultura y Turismu baxo la presidencia de la Directora Xeneral de Política Llingüística, Consuelo Vega Díaz.
 
El restu del xuráu taba formáu José Antonio García Fernández (escritor y guionista de cómic), Ernesto García del Castillo, Neto, (dibuxante gráficu) y Jorge Iván Argiz (escritor y director del Festival de Cómic d'Avilés). Actuó como secretaria María Antonia Pedregal Montes, Xefa del Serviciu de Política Llingüística.

Segùn informen dende la Conseyería "ente les obres presentaes, el xuráu decidió por unanimidá conceder el Premiu al testu tituláu Manzajú, al valorar que se trata d'una gran narración gráfica, mui sólida y moderna y con un gran dominiu técnicu de tolos recursos propios del cómic". El testu presentóse baxo l'alcuñu “La Gocha Pegui”. Una y buenes abrióse la plica, l'autor resultó ser Rumaldo Antón Barbero de Diego.

Ruma Barbero nació en Xixón nel 1971. Ye llicenciáu en Bellas Artes na especialidá d'“Escultura” pola Universidá de Salamanca y miembru fundador del grupu de folk asturianu “Felpeyu”, col que continúa n'activo. Ganador nel añu 2003 del primer Premiu de Cómic de la Comarca de la Sidra, tamién ye fundador, en xunto con Xosé Antón García Sampedro, de la editorial Cactus Cómics, que publicó dalgunos de los títulos más influyentes d'esti xéneru n'Asturies. D'otra banda, tamién ye un destacáu diseñador gráficu, autor de les carátules de discos de Felpeyu, La Bandina o DRD y de carteles teatrales pa les actuaciones del grupu Nun Tris.A mediu camín ente'l cómic y el diseñu gráficu ta'l Cómic-CD de Los Ciquitrinos “Faciendo l’indio” (2009), del que tamién ye autor.Acullá de lo específicamente rellacionao col cómic, Ruma Barbero ye lletrista de los grupos Felpeyu, Los Ciquitrinos, Tejedor y Blima, amás de collaborador de delles publicaciones periódiques: el diariu El Comercio, el selmanariu Les Noticies o l'Anuariu de la Música Asturiana.

Contador Estadistiques