El Conceyu d'Uviéu otorgó'l V Premiu Nacional de Folclore 'Martínez Torner', convocáu pola Escuela Muncipal de Música Tradicional Asturiana, a Silvino Antuña. El premiu entregaráse'l día 24 de payares del 2009 a les 19.30 hores na Sala de Cámara del Auditoriu Príncipe Felipe.
 

La Conseyería de Cultura, en collaboración cola Facultá de Bioloxía de la Universidá d'Uviéu, va entamar esti martes 10 de payares el "II Día de les Ciencies Asturianes". Dos van ser les actividaes programaes pa esti día. Darréu de la inauguración a les 12:00, va presentase'l llibru "Homo Sapiens: la epopeya d'un llinaxe", obra de Xosé María Fernández que resultó ganadora en 2008 del premiu d'ensayu Fuertes Acevedo. Nesti actu, xunto al autor, que ye miembru del Institutu Européu de Bioinformática, va tar Xosé Ánxelu Gutiérrez Morán, del Institutu Español d'Oceanografía.

Durante los díes 21 y 22 d'esti mes de payares la Fundación Belenos va desendolcar la décima edición del so Seminariu d'Estudios Asturianos, nesta ocasión baxo'l títulu de "Un llugar nel mundu. Conxusta alrodiu d'una idea d'Asturies". Esta edición, como ye davezu, va allugase na Puela d'Allande.

La obra “Les puertes del paraísu” del escritor Ismael González Arias ta acabantes de ser premiada cola segunda edición del “María Josefa Canellada” de lliteratura infantil y xuvenil n’asturianu. El premiu, empobináu pola Conseyería de Cultura, foi dáu a conocer esti mediudía na Casa de Cultura “María Josefa Canellada” de Santolaya (Cabranes) y el xuráu valoró da-y por unanimidá’l premiu por “ser una novela dirixida a un públicu xuvenil, pero que pue interesar tamién a l’adultu”.

Ta acabantes d’espublizase’l primer númberu de “Faceira”, una revista en formatu dixital que dende Zamora quier investigar y divulgar el patrimoniu cultural del dominiu llingüísticu ástur. Escrita na nuesa llingua, la revista quier sirvir de puntu d’alcuentru ente tolos territorios que falen asturianu. Asina, el títulu de la revista fai referencia’l aprovechamientu de los pastos comunales. Pa ello, nesti primer númberu cuenten con artículos de renomaos espertos d’Asturies, Lleón, Zamora y Miranda.

Pal xurista Nicolás Bartolomé Peréz “el gobiernu de Castiella y Lleón nun tien nengún interés en promover la llingua, entienden que yá ficieron abondo mentando la protección del lleonés nel artículu 5.2 nel Estatutu”. Asina lo dixo nes Xornaes d’Estudiu qu’organiza l’Academia de la Llingua na Facultá de Filoloxía, onde’l xurista presentó la comunicación “La regulación xurídica de la nuesa llingua en Castiella y Lleón”.

El presidente del PP asturianu, Ovidio Sánchez, esixó que la Rede Treseuropea del Tresporte incluya'l nuesu país pente la construcción del AVE del Cantábricu. Según el dirixente popular "un proyectu que yá taba aprobáu y que foi paralizáu pol Gobiernu de José Luis Rodríguez Zapatero col combayamientu del presidente asturianu, Vicente Álvarez Areces, y del so conseyeru d'Infraestructures, Francisco González Buendía".

El cantautor asturianu Toli Morilla va presentar el so últimu trabayu discográficu tituláu "Diez cantares de Bob Dylan", un discu homenaxe versioneando n´asturianu diez de los cantares más conocíos del cantautor norteamericanu Bob Dylan, una llabor que'l so autor define como "dalgo natural" pola influencia que siempre tuvo'l músicu nel so llabor compositivu.

Mientres que’l 76% de la xeneralidá d’escritores n’asturianu nun dexaría enxamás de facer lliteratura nel nuesu idioma, esi porcentaxe medra hasta’l 90% cuntando namás les muyeres qu’escriben n’asturianu. Sicasí, la mayoría de les autores trabayen en dos llingües; castellán y asturianu, cosa que nun pasa colos homes. Amás, mientres que la mayoría d’escritores tuvieron dalgún contautu cola llingua nel sistema educativu (69%), mirando namás pa les muyeres, vemos que’l 68% nunca foron formaes n’asturianu.