La Universidá d’Uviéu y la Masaryk, una de les más importantes de la República Checa, trabayen conxuntamente pa llevar la nuesa llingua y la nuesa lliteratura a les aules cheques. Será una esperiencia pilotu que durará dende febreru hasta xunu de 2010 y cuntará col sofitu de la Unión Europea. L’encargáu de poner les clases será’l filólogu Cesáreo García, cofundador de la banda Dixebra y exdireutor de la Estaya de la Llingua d’Avilés.

El Bloque por Asturies ta acabante de denunciar pente un escritu dirixíu al coordinador del 112 d´Asturies, César Álvarez Avello, un posible casu de discriminación llingüística por cuenta del "tratu que recibió una muyer, yá mayor, al facer usu del serviciu d’atención a los ciudadanos nel so idioma maternu, l’asturianu".

Pablo Antón Marín Estrada resultó ganador de la trixésima edición del Premiu de novela en llingua asturiana "Xosefa Xovellanos" que concede la Conseyería de Cultura. El xuráu que concedió esti galardón aconceyó na sede de la Conseyería de Cultura y Turismu baxo la presidencia de la Directora Xeneral de Política Llingüística, Consuelo Vega Díaz, y cola participación de los escritores Miguel Barrero, Miguel Rojo y Taresa Lorences. Otres siete noveles presentáronse al premiu, dotáu con 7000 euros.

L'executivu gallegu sorrayó ayeri que la estensión de los servicios de la Televisión de Galicia (TVG) a zones de comunidaes llenderes -como Asturies, El Bierzu (Castiella y Lleón) y Sanabria (Zamora)- constitúi "una demanda social" y sorayó que, en tou casu, va facese "d'acordies y cola collaboración" de los otros gobiernos autonómicos.

Uviéu va acoyer un taller d'instalación del sistema operativu Ubuntu n'asturianu'l esti próximu vienres y sábadu. Concretamente'l vienres 20 a les 19:00 hores va desendolcase una charla d'averamientu a Ubuntu y al software llibre y el sábadu 21 de 9:00 a 14:00 y de 15:00 a 21:00 hores va tener llugar el taller d'instalación d'Ubuntu. Esa iniciativa parte de Softastur y cuenta col sofitu de la Xunta pola Defensa de la Llingua Asturiana.

L'hispanista Samuel G. Armistead, de la Universidá de California-Davis, destacó al romanceru asturianu como ún de los patrimonios más importantes de la tradición oral hispánica, xunto col de Galicia y les tradiciones sefardís. Asina lo esplicó en declaraciones a los medios, antes d'entamar la ponencia qu'ofreció na primer xornada sobre'l 'Patrimoniu oral d'Asturies', qu'organiza'l Seminariu de Filoloxía Asturiana de la Universidá d'Uviéu.

Xulio Arbesú resultó ganador de la decimoquinta edición del Premiu d'ensayu en llingua asturiana "Máximo Fuertes Acevedo", que concede la Conseyería de Cultura . El xuráu que concedió esti galardón aconceyó a les 13.00 hores na sede de la Conseyería de Cultura y Turismu baxo la presidencia de la Directora Xeneral de Política Llingüística, Consuelo Vega Díaz, y cola participación de los escritores y investigadores María Cueto, María Antonia Mateos y Xurde Sierra.

La Universidá d’Uviéu, al traviés del Seminariu de Filoloxía Asturiana, y la Conseyería de Cultura lleven trabayando dos años nel primer traductor de testos asturianu-castellán/castellán-asturianu. D’equí a un mes, los sos responsables cuenten con poder presentar una versión en pruebes en formatu beta d’esta ferramienta, que pue ser un importante pegoyu pa la normalización del asturianu.