Barbero algama’l so tercer Alfonso Iglesias con ‘Seltegu’

Yá se conoz al primer ganador de los Premios Lliterarios 2019. Como vien siendo vezu nos años últimos, l’Alfonso Iglesias de cómic ye’l primeru en fallase de los cinco, repitiendo como merecedor del gallardón Ruma Barbero, que yá lu llevara nos años 2009 y 2015, agora con ‘Seltegu’, un trabayu “autobiográficu”.

El xuráu del gallardón, formáu polos autores de cómic y ilustradores Raquel Lagartos y Anxelu González Fernández –ganador de la edición pasada con ‘Cacique blancu’–, y la ilustradora Sonia García Sánchez, baxo la presidencia d’Antón García, direutor xeneral de Política Llingüística, destacó que se trata d’una obra “mui plástica y bien compuesta que domina los recursos narrativos del xéneru”. Barbero presentóla baxo’l nomatu ‘Hariri’.

Con esti gallardón, valoráu en 5.000 euros tres un aumentu de 2.000 con respeuto a la convocatoria anterior, el xixonés yá suma trés Alfonso Iglesias n’once ediciones. El primeru llevólu precisamente na primera d’elles, nel 2009, con ‘Manzajú’, y la segunda nel 2015 con ‘El viaxe a la lluz’.