La protagonista de la semeya 10.000 de la campaña “Yo doi la cara pola oficialidá” del CAO ye Raquel Braga Corral, militante de la Xunta pola Defensa de la Llingua na Cuenca del Nalón y encargada de xubir les primeres 5.000 semeyes a la galeria de flickr. Asina lo anunciaben güei na Casa de Cultura de La Pola Siero los integrantes de la organización na localidá y Poli Mencía, coordinador de la iniciativa.

El Grupu Popular de les Cortes de Castiella y Lleón refugó una proposición non de llei sobre la continuidá de la emisión de la TVG en Senabria y El Bierzu al traviés de la TDT. La propuesta foi defendida pol procurador socialista Pedro Nieto na Comisión de Tresportes ya Infraestructures de les Cortes castellano-lleoneses, pero tres el non del PP la TVG nun se podrá ver en Lleón y Zamora tres l’apagón analóxicu de 2010

Hasta un 40 por cientu de les muyeres n'Iberoamércia son víctimes de violencia machista y seis de cada diez sufre maltratu psicolóxicu, según un estudiu de la Comisión Económica p'América Llatina y el Caribe (Cepal) sobre la violencia contra la muyer.

L'informe '¡Ni una más! del dicho al hecho: ¿Cuánto falta por recorrer?' redactóse a iniciativa del secretariu de Naciones Uníes, Ban Ki Moon, en febreru del 2008 y presentáu esti martes en Ciudá de Guatemala pa prevenir y eliminar la violencia a la esconta de la muyeres y neñes del mundu.

La Coordinadora Ecoloxista d’Asturies vien de presentar alegaciones contra’l proyeutu de Sílices la Cuesta S.L. de crear una nueva balsa de llodos con una ocupación de 15.000 m2 nes canteres de la Cuesta en Salas. Pa la CEA'l proyeutu contradiz la llegalidá al nun restaurar la cantera y non reciclar los vertíos industriales, amás de poner en peligru’l camín de Santiago.

El vicepresidente de la Generalitat de Cataluña, Josep Lluís Carod-Rovira, afirmó que diba ser una "gravedá estraordinaria" que la sentencia del Tribunal Constitucional (TC) sobre l'Estatut puea modificicar una norma roblada en referendu. Carod-Rovira destacó que si'l dictame del TC ye negativu, Cataluña deberá plantegase si quier siguir n'España.

El coordinador d'Izquierda Xunida (IU) de Castiella La Mancha, Daniel Martínez, anunció güei que les federaciones polítiques d'Asturies y de Castiella La Mancha, algamaron un acuerdu pa que la sede del bancu Liberta, nel que s'integrarán Caja Castilla La Mancha (CCM) y Caxastur, tean en Cuenca, y poro calténgase l'actual sede social de la caxa castellano-manchega.

En rueda de prensa, Martínez esplicó que cuenten col compromisu del representante d'IU nel conseyu d'alministración de la caxa asturiana.

La Conseyería de Mediu Ambiente, Ordenación del Territoriu y Infraestuctures reforzará de magar esta selmana les actuaciones encaminaes a protexer la población de salmónidos en siete ríos asturianos. Nesti sen, el próximu xueves día 26 entamarán los controles de la población de cuervos cagalones grandes nos ríos Sella y Narcea.

La Conseyería de Cultura del Gobiernu asturianu anunció güei l'entamu d'una campaña mediática d'espardimientu de la toponimia tradicional de los 40 conceyos qu'hasta'l momentu la recuperaron y oficializaron. Un anunciu en televisión y cine, y cuñes de radio promoverán la utilización de los nuevos términos aprobaos pol Conseyu de Gobiernu del Principáu.

L’asociación eonaviega Abertal vien de criticar los “sectores más radicales y marxinales del asturianismu políticu” que s’oponen a que la TVG puea vese nel Navia-Eo. Ente estos sectores señalaron “les manifestaciones ridícules” de l’Academia de la Llingua Asturiana, del diputáu d’IX Francisco Javier García Valledor o les “desafortunaes” declaraciones de l'alcaldesa d’El Franco, Cecilia Pérez. Pal coleutivu, estes actitues nun deben ser teníes en cuenta por “antidemocrátiques y oponese a la llibertá de llibre elección d’información del ciudadanu”.

El presidente depuestu d'Hondures, Manuel Zelaya, encamentó esti fin de selmana a la comunidá internacional a nun reconocer les elecciones del 29 de payares, al tiempu que criticó'l papel d'Estaos Uníos por llexitimar estes elecciones, pese a que'l secretariu xeneral de la Organización d'Estaos Americanos (OEA), José Miguel Insulza, aseguró que Washington "tovía espera un xestu de les persones pa da-y cursu al procesu".