La Universidá asturiana foi escoyida ente les nueve primeres universidaes españoles cola acreditación de Campus d’Escelencia Internacional. El Conseyeru d’Educación, José Luis Iglesias Riopedre, valoró esti fechu de “gran ésitu que permitirá’l futuru desendolcu de la Universidá y de la sociedá asturiana”.

Los vixilantes del Edificiu Históricu de la Universidá impideron güei acceder al so interior a un grupu d'estudiantes y profesores, principalmente de les facultaes de Ciencies de la Educación y maxisteriu, que protestaben contra'l procesu de fusión de centros. Nel interior de la instalación, tenía llugar la celebración de la patrona universitaria, Santa Catalina.

Nun fechu ensin precedentes na prensa del Estáu, doce diarios catalanes publiquen güei xueves un editorial conxuntu baxo’l nome de “La dignitat de Catalunya/La dignidad de Catalunya”, onde espeyen nuna sola voz el desalcuerdu de la sociedá catalana con un posible recorte del Estatut pol Tribunal Consitucional. Un testu que ye frutu d’un doble pautu políticu, Parlamentu de Cataluña y Cortes Xenerales, y qu’amás, foi sancionáu polos electores, sentencien.

La Coordinadora Ecoloxista d'Asturies presentó alegaciones a la planta de coxeneración de 21 Mw alimentada a gas proyectada na cementera d'Aboño, en Carreño, solicitáu per parte de la sociedá mista HC Tudela Generación SL, según informó la Coordinadora al traviés d'una nota prensa.

La Delegación d'Economía y Facienda n'Asturies publica güei nel BOE una resolución pola que s'anuncia la subasta pública del inmueble antiguu parador de Payares, asitiáu en L.lena y propiedá de l'Alministración Xeneral del Estáu.

El tipu de la subasta, según la resolución consultada por Europa Press, queda fixáu en 771.700,61 euros. El plazu pa la receición de les ufiertes acabará a les 13.00 hores del día 19 de xineru del 2010.

La eurodiputada nacionalista galesa Jill Evans, presidenta de l’Alianza Llibre Europea (ALE), entrugó güei na sesión plenaria del Parlamentu comunitariu si taba na axenda de la próxima xunta del Conseyu européu del 10 y 11 d’avientu, falar sobre les consultes independentistes que van celebrar 150 conceyos catalanes el 13 d’avientu.

Mañana, 26 de payares, a les seis de la tarde, la Xunta de Personal Docente de los sindicatos SUATEA, FE CCOO y CSIF, convoca al profesoráu contra la Llei d’evaluación y en defensa de la educación pública na Plaza d’España d’Uviéu. Ellí entamará una manifestación que llegara hasta la sede de Presidencia del Principáu.

La Mesa de la Comisión d’Educación, Cultura y Deporte de les Cortes d’Aragón recibió 258 enmiendes de los grupos parlamentarios a la Proposición de Llei d’Usu, Protección y Promoción de les Llingües Propies d’Aragón, una propuesta del PSOE que quier reconocer “la pluralidá llingüística d’Aragón y garantizar el so usu”. De les 258 enmiendes, 11 foron presentaes por Chunta Aragonesista, 60 pol PP, una por cada artículu de la llei, 48 pol Partido Aragonés y 39 por IU.

L'Executivu asturianu zarró güei nel conseyu de Gobiernu'l presupuestu pal próximu 2010, unes cuentes qu'ascienden a 4.428 millones d'euros, lo que supón un incrementu d'un 0,775 sobre'l 2009. Les cuentes aprobaránse de manera definitiva'l próximu llunes nel Conseyu de Gobiernu estraordinariu pa llevales al parlamentu'l "martes o'l miércoles".

La Comisión de Réxime Foral del Parlamentu de Navarra aprobó esta mañana'l dictame de la proposición de Llei Foral pa modificar la Llei del Vascuence, de manera que la zona mista amplíase a los conceyos d'Aranguren, Belascoain, Galar y Noain-Valle d'Elorz "siempre qu'asina lo acuerden previamente, por mayoría absoluta, los plenos municipales".