El Conceyu de Cabranes acuerda cola SGAE reducir un 25% y pagar a plazos la so deuda por derechos d'autor

El Conceyu de Cabranes y la Sociedá Xeneral d'Autores y Editores (SGAE) llegaron a un acuerdu qu'acaba col pleitu pol qu'esta entidá reclamaba más de 6.000 euros en conceptu de derechos d'autor xeneraos en dellos eventos musicales. L'Ayuntamientu pagará a plazos la so deuda, que se verá reducida nun 25%, ye dicir, 4.541 euros. El xuiciu, previstu pal próximu llunes, 30 de payares, nun se celebrará.

Asina lo informó la Sociedá al traviés d'una nota prensa. Según esplicó'l comunicáu, "tres el conceyu calteníu ente Alejandro Vega (alcalde de Cabranes) y Javier Vidal (director de la SGAE Noroeste), firmóse un acuerdu, que se presentó nel xulgáu esta mesma mañana, según el cual la SGAE facilitará al conceyu'l pagu fraicionáu de los derechos d'autor atrasaos en dos exercicios presupuestarios".

Según la sociedá, "el Conceyu de Cabranes, al traviés de la Federación Española de Municipios y Provincias (FEMP), acuéyese a un conveniu cola SGAE que-y proporciona un aforru d'hasta'l 25% de descuentu nes tarifes de derechos d'autor".
  
La SGAE informó de que "tanto Alejandro Vega como Javier Vidal mostráronse satisfechos con un acuerdu que regulariza la rellación ente ambes entidaes".
  
La demanda de la SGAE referíase a verbenes de les fiestes de la capital cabraniega, Santolaya, actividaes de l'Axenda Cultural del Principáu d'Asturies y actuaciones de música tradicional celebraes ente los años 2002 y 2008.