Familiares de represaliaos enterraos en Cabal.leros (Ayer) defenden los trabayos de desentierru nel fueyu común

|

Los familiares de los represaliaos que podríen tar enterraos nel fueyu común de Cabal.leros, na población ayerana de Felechosa, defendieron güei los trabayos de desentierru que se tán desarrollando na zona dende'l sábadu de la pasada selmana. Trátase, señalaron, d'unos llabores que cuenten coles autorizaciones encesaries y que tienen como oxetivu "pesllar la firida ente les dos Españes cola recuperación de los restos enterraos en fueyos illegales".

Asina, aseguró güei Jesús Celestino García, sobrín d'una de les víctimes que, de primeres, ta baxo tierra nesti puntu del territoriu ayeranu, onde los miembros de l'asociación Foru pola Memoria continúen trabayando.
Pa García, nun hai nenguna duda de qu'esti desentierru tán desarrollándolu "profesionales y col mayor respetu", polo qu'avaló los trabayos y plantegó la necesidá de dexar a un llau polémiques como la provocada nos últimos díes con declaraciones d'otres asociaciones de Memoria Histórica contraries a los trabayos en Cabal.leros. Una tranquilidá y un respetu pa esta iniciativa nel fueyu común de Cabal.leros que tamién pidieron güei otros familiares de víctimes como Charo Fernández, que mostró'l so apoyu "a l'asociación y a tolos que tán equí, porque gracies a ellos podremos recuperar los restos" de persones como'l so güelu.
  
Los familiares ficieron güei estes declaraciones demientres una visita a los trabayos nel fueyu común onde, hasta'l momentu, atopáronse restos que podríen pertenecer hasta a nueve persones diferentes, anque los testimonios y les pruebes recoyíes planteguen la posibilidá de que na zona haya enterraos ente 20 y 30 represaliaos. Poro, los llabores nel terrenu continuarán dellos díes más.
 

Contador Estadistiques