Areces diz que'l presupuestu ye un exerciciu de responsabilidá qu'ayudará a Asturies a salir de la crisis

El presidente del Principáu d'Asturies dixo güei que'l presupuestu rexonal pal 2010 ye un exerciciu de responsabilidá del Gobiernu asturianu que pon en práctica'l pactu soscritu n'ochobre del 2008 cola coalición IU-BA-Los Verdes, y que permitirá a Asturies continuar nel camín de la recuperación y salida de la crisis.

Nunes declaraciones realizaes en Marsella, onde participa nun conceyu de la Conferencia de Rexones Periféricu Martítimes (CRPM), aseguró amás que les cuentes qu'aprobó'l Conseyu de Gobiernu y que remitirán a la cámara recueye "fielmente" los trés grandes oxetivos que se proponíen col acuerdu.
 
Asina, defendió que permitirá caltener la inversión y el gastu productivu n'estándares asemeyaos a esti añu pa siguir desarrolando la economía y creando emplegu. En segundu llugar, intensificará les polítiques de proteición social pa les persones más necesitaes como consecuencia de la crisis y garantizará'l derechu suxetivu deriváu de la Llei de Dependencia.
  
Al so xuiciu, los 4.428 millones d'euros colos que la rexón contará posibilitarán desarrollar una política d'austeridá nel gastu corriente que nun tea lligáu a la prestación de servicios públicos esenciales.
  
Señaló que pese a la cayida d'ingresos de toles alministraciones públiques, Asturies contará con un "bon" presupuestu que crez moderadamente, que caltién les inversiones nuna cuantía llixeramente superior al añu anterior y utiliza tolos escenarios d'inversión que provién de los organismos del sector públicu.
  
"Cumplimos dafechu los oxetivos del acuerdu de concentración y caltenemos el desarrollu de centenares de proyectos que se tán desarrollando n'Asturies, y que son claves pa la so modernización y pa garantiza el so futuru", destacó.
  
Álvarez Areces refirióse amás a otros mecanismos estra presupuestarios que permitirán desarrollar a lo llargo del 2010 obres como les dos grandes autovíes d'accesu a la Zalia y el desarrollu de l'AS-III y l'acabación de la obra civil del Hospital Universitariu Central d'Asturies (HUCA), ente otres