El director del Serviciu Asturianu d'Emplegu anima a la mocedá qu'aproveche que ta en paru pa formase

El director del Serviciu Asturianu Públicu d'Emplegu, José Luis Álvarez, animó güei en Xixón a los mozos desemplegaos a que vean nello una oportunidá p'aprovechar esti tiempu que tán nel paru a formase, de cara a tar meyor preparaos una vez que se salga de la crisis. Asina lo dixo dempués de visitar les intalaciones de dos escueles taller en Xixón, 'El Coto', y 'EGijón II', la primer d'elles dirixida, como novedá n'esclusiva a persones con discapacidá.

Álvarez aseguró que la crisis salse y cuando se faiga, cuantos más mozos, meyor, y cuanto más formaos muncho más. Na so opinión, la formación de los mozos ye estratéxica pa poder tener sectores y empreses competitives. De la mesma manera, alertó de que puea dase la paradoxa de que cuando se salga de la crisis falte personal cualificáu. Tamién apostó por que les empreses s'animen a contratar.
 
Amás, señaló que los mozos que participen nes escueles-taller, ente los 16 y los 25 años, tán dos años nelles, nos que primero pasen per un periodu formativu pa dempués algamar la condición d'alumnos-trabayadores, con un contratu llaboral temporal. Dempués existen ayudes a les empreses pa que los contraten, que supón una sovención de 5.000 euros añales. Too ello pa facilitar l'accesu al mercáu llaboral nun periodu d'ente dos y cuatro años.
  
Pela so parte, Fernández señaló que nesti momentu hai cuatro proyectos d'escueles taller xunto col Principáu, que sumen 292 contrataciones y un presupuestu de 3.830.000 euros. Sobre estos dos en concreto, indicó que sumen 95 persones --incluyíos los profesores-- y dalgo más de dos millones d'euros.
  
La de 'El Coto' forma n'encuadernación, dixitalización o tratamientu de documentos, mientres que la segunda ofrez formación n'aspectos tan tecnolóxicos como programación de videoxuegos o plataformes dixitales de formación. Estes últimes, según Fernández, son unes ocupaciones con futuru, como lo demuestra qu'en cinco años duplicaron la so facturación. La edil tamién apostó por que se dea una oportunidá a les persones con discapacidá, que tien competencies.