Israel presiona a Europa pa mantener la totalidá de Xerusalén nel so poder

Israel dio ayeri, ún d’avientu, instrucciones a los sos embaxadores de presionar a los gobiernos de la UE pa que nun reconozan Xerusalén Este como zona árabe. La ofensiva diplomática surde tres una iniciativa sueca, Estáu presidente de turnu de la Unión, pa que la selmana viniente los ministros d’Esteriores europeos soliciten la declaración de Xerusalén Este como capital palestina, amosando asina'l sofitu de la UE a una posible declaración unillateral pol pueblu palestín del so propiu Estáu.

El borrador suecu afala a l’entamu de les negociaciones xudío-árabes con un calendariu específicu, cola sida d’algamar un Estáu palestín “independiente, democráticu y viable en Cisxordania y Gaza con Xerusalén Este como capital”. La midida cuenta con poques posibilidaes de prosperar yá que nun ta nidiu si va figurar nel orde del día, pa ello, sería necesariu que los embaxadores europeos aprobaren mañana en Bruxeles la so inclusión na axenda.
 
Israel cuenta con algamar la oposición de los sos aliaos y que’l borrador suecu nun llegue a ser motivu de discutiniu. Los hebreos confíen na oposición d’Alemaña, Italia, Reinu Xuníu y otros países que vienen negando la posibilidá d’alderique sobre la situación de Cisxordania.
 
L'ESTATUS DE XERUSALÉN
Israel proclamó Xerusalén como capital en 1950, dos años depués de la creación del estáu hebréu, y asitió ellí les sedes del gobiernu, el parlamentu y otros órganos alministrativos. La ciudá fora dixebrada en dos partes (Israel y Xordania) tres l’armisticiu de la guerra árabe-israelina de 1948, polo que la capitalidá xudía namás afeutaba a la parte occidental. Na guerra de los seis díes de 1967, Israel conquistó la parte oriental (Xerusalén Este) y la incorporó al restu del conceyu. En 1980, el gobiernu hebréu aprobó la Llei de Xerusalén, que falaba de la ciudá como la “capital eterna ya indixebrable” del país. Énte esti fechu, la ONU aprobó la resolución 478, que declaraba nula la llei israelina y aconseyaba a los Estaos miembros treslladar les sos embaxaes a Tel-Aviv como midida de castigu.