Entréguense en Colunga los premios del Concursu de Cómic Comarca de la Sidra

A les seis de la tarde, nel Centru Cultura Sala Lorenzo de Colunga, va tener llugar l’actu d’entrega de los premios de la séptima edición del Concursu de Cómic n’asturianu Comarca de la Sidra. La obra futurista “Nel día de la victoria”, del autor mierense José Juan González, ye la ganadora. Del mesmu mou, el xuráu concedió dos accésit de 200 euros caún a la futurista “Creación 3.0”, d’Enrique Carballeira y “Fuñería” del xixonés Diego Bernardo Álvarez, una obra d’ambiente mitolóxicu.

Na obra ganadora, “Nel día de la victoria”, nárrase una escura historia ambientada nun Nueva York en ruines. L’autor, que lleva un premiu de 500 euros, ye un dibuxante autodidacta con un estilu mui personal que yá foi reconocíu con dellos premios. El xuráu solliñó la calidá del dibuxu y el guión, amosando un dominiu del espaciu y la narrativa al traviés d’un reconocible estilu técnicu en llápiz y carbonizu.
 
Na entrega de premios, onde l’actor Carlos Alba fairá una actuación, va presentase la esposición que recueye los trabayos seleccionaos esti año. La mesma va asitiase na Casa de Cultura de Colunga hasta’l 8 de xineru, cuando se tresllade a Nava pa permanecer tol mes.
 
En próximes feches cuenten poner en circulación el llibru que recueye los trabayos ganadores y que será’l númberu siete de la colección. El concursu de cómic ta empobináu pola Mancomunidá Comarca de la Sidra cola collaboración de la Conseyería de Cultura y Turismu, l’Institutu Asturianu de Xuventú y el patrociniu de la Obra Social y Cultural de Caxastur.