Morales convoca'l Conceyu Mundial de los Pueblos sobre'l Cambiu Climáticu tres el "fracasu" en Copenhague

El presidente bolivianu, Evo Morales, propunxo esti miércoles convocar el Conceyu Mundial de los Pueblos sobre'l Cambiu Climáticu'l próximu mes d'abril tres calificar de "fracasu" el reciente conceyu de Copenhague, col únicu oxetivu inicial d'algamar un acuerdu vinculante pa reducir les emisiones de CO2 a nivel global más p'allá del 2012, cuando acaba'l Tratáu de Kioto.

El mandatariu aymara esplicó que'l combate contra'l calentamientu global debe guiase polos principios de defender la vida y la humanidá, asina como los derechos de la Madre Tierra.

"L'oxetivu ye llograr una posición de consensu pa plantegar nel próximu Conceyu sobre'l Cambiu Climáticu que se realizará en México n'avientu del 2010", esplicó en rueda de prensa nel Palaciu del Gobiernu.
  
Morales defendió la necesidá de definir en dichu conceyu les propuestes que deberíen presentase dempués n'avientu del 2010 en México y precisó que nel conceyu d'abril tamién se convidarán espertos, académicos y representantes de les organizaciones sociales, amás de los xefes d'Estáu.
 
FRACASU EN COPENHAGUE
  
De la mesma manera, atribuyó'l "fracasu" del conceyu qu'acoyó hasta'l pasáu vienres la capital danesa a la actitú de los países industrializaos que, al so xuiciu, nun apostaron por enfrentase a les causes del calentamientu global, frutu na so opinión del modelu capitalista, sinón sólo los efectos del mesmu.
  
"Les causes del calentamientu global del planeta orixínense nuna irracional y non llendada industrialización promovida poles grandes poetencies que contaminó l'ambiente y punxo en riesgu la vida de los serves vivos, non sólo de los seres humanos", insistió.
  
El presidente bolivianu llamentó que dalgunos cabezaleros mundiales prefieran optar pol dineru y les ganancies y non pola defensa de la vida. "Ye necesario que los gobernantes optemos por contribuyir a la vida pa salvar a la humanidá y non pa matala", encamentó, al tiempu que refugó dafechu que'l fracasu en Copenhague se debiere a les actitúes de China, Venezuela y Bolivia.
  
"Elevar el calentamientu global a dos graos centígrados sería una amenaza contra la sobrevivencia del mundu, al puntu qu'elevará les agües de los océanos hasta provocar la desapaición d'isles onde viven seres humanos", sorrayó.
  
Poro, señaló la importancia de que los países industrializaos se decaten de la necesidá de preservar la Madre Tierra pa garantizar la vida humana. "Los Derechos de la Madre Tierra son más importantes que los propios Derechos Humanos", insistió.
  
Morales acoyó favorablemente la decisión de la ONU de promover l'adopción d'una resolución a favor de vivir n'armonía cola naturaleza y sorrayó'l so deséu de qu'ello valga p'avanzar na aprobación de la Declaración Universal de los Derechos de la Madre Tierra.